Hyttenaboar installerer overvakingskamera etter fire brannar

Hege Fiskerstrand og mannen har lenge hatt planar om å sette opp kameraovervaking ved den nye hytta si på fjellet. No tør dei ikkje vente lenger.

– Eg er frykteleg trist og deppa, eg tenkte ikkje det skulle bli slik, det hadde eg aldri tenkt, seier Hege Fiskerstrand.

Onsdag var ekteparet oppe på Sulafjellet og fekk ordna overvakingskamera. Tidlegare har ho ikkje ønskt det, men då den fjerde hytta i området brende natt til tysdag, ombestemte ho seg.

Hyttefeltet på Sulafjellet ligg berre ein halv times gåtur frå foten av fjellet. Mange av dei som har bygd her, bur nede i bygda og kan sjå opp på hyttene sine.

Fire brannar på to år

Det har vore oppsiktsvekkjande mange brannar på Sulafjellet. Det finst rundt 35 hytter i dette området på nordsida av fjellet utanfor Ålesund. Dei siste to åra har fire hytter eller anneks brent.

Johnny Nybø og familien er i ferd med å sette opp ei hytte berre 50 meter unna den siste brannen. Natt til tysdag blei han vekt av kona som såg flammane på fjellet.

No har også dei bestemt seg for å sette opp overvakingskamera. Nybø trur hyttene er påtent og at det kan bli fleire.

– Ja, utvilsamt, så lenge dei ikkje får tak i den personen. Det er skremmande og veldig frustrerande, seier han.

Politiet etterforskar

Politiet gjekk tidlegare denne veka ut og sa at dei var styrke i trua på at den siste brannen er påsett og at det kan vere ein samanheng mellom dei fire brannane. No har dei fått hjelp frå Kripos i etterforskinga, og etterlyser tips om folk som har vore på tur i området på nattetid.

Politiet har så langt ikkje svar på kven som står bak. Politiadvokat Magne Kvalvik i Møre og Romsdal politidistrikt skjønar godt at hyttenaboane no set opp kameraovervaking

– Ja, det synest eg er ein god ide. Då får ein auge og bilde på det som skjer der oppe, det synest eg absolutt er bra, seier han.

Han seier samtidig at det ikkje finst noko haldepunkt for å seie at det skal bli fleire hyttebrannar på Sulafjellet no.

Tør ikkje overnatte åleine no

Hege Fiskerstrand seier ho har overnatta fleire gonger åleine på den nye hytta deira på Sulafjellet. No tør ho ikkje det. Ho synest det er trist og leitt.

– Eg trur eg må ha meg ein pause til våren, i alle fall, før eg ligg der åleine, seier ho.

Hyttenabo Johnny Nybø synest det som har skjedd er trist.

– Det er heilt forferdeleg trist, det skulle ikkje vere nødvendig på Sulafjellet, seier han.