Den nye landbruksministeren får støtte frå fleire av sambygdingane sine i Ørskog. Nabokjerringa har stor tru på den nye statsråden, men null tiltru til Framstegspartiet.
– Eg trur ikkje dei kan utrette så veldig mykje positivt, seier bonde Eli Sjåstad.
På slottsplassen i raud bluse
Men samstundes var det god stemning hos mange av dei som følgde med på direktesendinga då Erna Solberg presenterte den nye regjeringa si. Heilt bakerst, med raud bluse, kom til slutt ei smilande Sylvi Listhaug spaserande ut på slottsplassen.
– Kongen er vel så glad at han ikkje vil sleppe dei ut, kommenterer Frp-veteran Øystein Eide tørt.
– Dette er høgdepunktet, etter mange, mange, mange års kamp
Fin dag i Ørskog
Frp-ordførar Thorbjørn Fylling i Ørskog er ein av dei som syns det blei ein fin dag.
– Dette var fint, og dette var spennande, og dette gler vi oss til framhaldet på, seier Fylling. Og får støtter frå leiaren i eldrerådet i Ørskog.
– Det at ho Sylvi ... Listhaug ... kom med som landbruksminister, må no vere kjempebra for å få litt utvikling i distrikta og landbruket.
– Men nokon trur ho vil leggje ned alt, vil ho ikkje det, altså?
– Nei, det er eit skremmebilde som dei har brukt, seier leiaren i eldrerådet i Ørskog, Terje Olsvik.
Delt støtte frå nabokjerringa
Nabokjerringa Eli Sjåstad har berre godt å seie om odelsjenta som no har blitt landbruksminister.
– Sånn eg kjenner henne er ho ei veldig dyktig dame, så eg trur nok ho kan gjere ein god jobb, seier Eli Sjåstad. Men politikken til Frp har ho liten sans for.
– Eg trur ikkje dei kan utrette så veldig mykje positivt, seier ho.
Frå bygda
Også Egil Vestre har sansen for bygdejenta Sylvi Listhaug.
– Eg trur ho vil gjere ein god jobb, ho har då trass alt bakgrunn frå bygdesamfunnet her, seier Listhaug.
– Men korleis skal det gå med ein frp-ar som landbruksminister, då?
– Eg er litt spent på det, då, men det skal vel gå bra, tenkjer eg, seier Vestre.