Fryktar turisttørke i Geiranger

Politikarane og flykrisa får skulda når fleire aktørar i turistnæringa i Geiranger no varslar turisttørke.

- Festtalar

- Det har vore svært mange festtalar etter at vi fekk Unesco sin verdsarvtittel, seier hotelldirektør Sindre Mjelva. Han meiner tittelen burde fått fart i rassikringsarbeidet på E 63 og planane om heilårs ferjedrift frå Hellesylt.

Les også:

Vinterstengd bygd

- Vi har fått ei usikkerheit blant turoperatørane våre på om regionen vår er tilgjengeleg, seier Mjelva.

I dag er ikkje Geiranger open for omverda året rundt. E39 mellom Eidsdal og ned Ørnesvingane er rasutsett og vinterstengd. Ferja mellom Hellesylt og turistbygda er berre i drift på sommarstid. Flyproblema den siste tida har gjort situasjonen ekstra ille, og dei første avbestillingane er allereie komne.

Halv million turistar

Årleg er 500 000 menneske innom Geiranger. Næringa fryktar at det kan bli færre turistar i åra framover. Og dei ber politikarane om å ta affære.

- Kanskje skal ein ikkje gløyme at vi ikkje berre er eit bygdesamfunn. På sommarstid er dette eit bysamfunn, nesten, målt i talet på besøkande. Vi syns det er svært viktig at politikarane tek tak i saka for oss, seier Katrin Blomvik, direktør for stiftinga Geirangerfjord verdsarv.