Åtvarar mot ulovleg sal av fisk: – Eit stort problem i næringa

Sommaren er i gang, og fleire nyttar anledninga til å dra på fisketur. Men dersom ein ønsker å selje fisken, bør ein passe på å ha papirarbeidet i orden.

– Vi ser ein bekymringsfull auke i annonsar der privatpersonar og fritidsfiskarar sel fisk direkte til andre privatpersonar. Eit døme er ei mor som annonserer og sel 70–80 kg filet som den mindreårige sonen hennar har fiska.

Det seier Nils-Olaf Larsen, gruppeleiar i Fiskeridirektoratet i ei pressemelding.

– Dette er ikkje lov, og kan føre til både bøter, inndraging av fangst og utstyr.

Vidare seier han at sosiale medium gjer det enkelt for folk å selje fisk, men det betyr ikkje at det er lovleg.

No vil dei at både kjøparar og seljarar set seg inn i regelverket slik at vidare sal ikkje held fram.

– Svart sal av fisk er ikkje noko nytt

Vigdis Torheim er kontrollansvarleg for Sunnmøre og Romsdal fiskesalslag.

Ho er einig med Fiskeridirektoratet i at ein bør vere obs på sal av fisk på sosiale medium.

Torheim er godt kjend med problematikken.

– Dette er ei stor utfordring i næringa, og det har det vore lenge. Svart sal av fisk er ikkje noko nytt, og vi jobbar så godt vi kan for å få folk til å forstå regelverket.

Ho seier det er viktig å ha eit kaisalsløyve når ein skal selje fangsten sin.

Og Torheim seier at det som kan verke som uskuldig sal, kan vere ulovleg.

– Kjøp og sal av fisk utan løyve er faktisk eit alvorleg lovbrot. Det skapar urettferd og skadar dei seriøse aktørane som driv på lovleg vis. Og i tillegg har vi ikkje kontroll på ressursuttaka i havet.

Vigdis Torheim seier det er fleire måtar ein kan sjekke om fangsten er lovleg på.

– Ein kan mellom anna kontakte salslaget for å høyre om seljar har løyve. Kaisalsløyve er berre lov å nytte seg av ved kaia, så sal utanfor kaia kan tyde på at det ikkje er lovleg.

– Må vere greitt i liten skala

Cecilie Løseth og Nils Erik Lange synest ikkje det er noko stort problem at folk sel fisk i liten skala.

Dei er på båtferie i Ålesund, og kjem med eksempel på kva dei synest burde vere greitt.

– Det er dumt visst folk gjer det i store mengder. No var vi nettopp i Sykkylven, og der hadde nokre gutar elevbedrift og selde litt fisk. Så i liten skala må det vere greitt, tenkjer eg, seier Cecilie Løseth.

Men dei synest det er bra at Fiskeridirektoratet tar grep og åtvarar mot det ulovlege salet.

– Eg synest jo det er bra, og ein skal ha fiskeløyve for å selje fisk i store mengder.