Politiet i Møre og Romsdal blei varsla om hendinga rundt klokka 02.51 natt til søndag.
– Ein person er frakta til sjukehus etter hendinga. Valden blir beskrive som grov, seier Tove Brunvold Holst-Dyrnes, operasjonsleiar i politiet.
Ho seier vidare at vedkomande blei frakta til sjukehuset i Volda. Skadeomfanget er så langt ukjent.
– Vi har ikkje fått avhøyrt han endå, seier Brunvold Holst-Dyrnes.
Søndag ettermiddag har politiet enno ikkje fått ei oppdatering på helsetilstanden til mannen.
To menn arresterte
Alle dei involverte skal vere menn i 30-åra. To menn blei arresterte i morgontimane søndag. Dei har status som sikta i saka.
Tove Brunvold Holst-Dyrnes, operasjonsleiar i politiet.
Foto: Casper Kanestrøm / PolitietDet er så langt uklart kva som var årsaka til valdshendinga, fortel operasjonsleiaren.
– Det må vi etterforske. Valden skjedde utandørs på Fiskå, seier Brunvold Holst-Dyrnes.
Dei to arresterte mennene er frakta til Ålesund der dei sit i arresten. Det er så langt uklart om dei blir avhøyrt i dag. Dei skal vere påverka av alkohol.
– Det kjem an på om det er mogleg å avhøyre dei i dag, seier operasjonsleiaren.
