Ordførar Anders Riise i Hareid er sterkt kritisk til innsparingstiltaka som administrasjonen i Ambulanse Midt-Norge foreslår.
– Det er ei rasering av beredskapen og ei svekking av tilbodet til oss, kommenterer han.
Føretaket må spare 25 millionar kroner i år, for å gå i balanse. Tiltaka som skal behandlast i styremøtet torsdag, vil spesielt ramme Nordmøre og Søre Sunnmøre – der talet på sjukebilar med døgnberedskap er foreslått halvert.
Halverer døgnberedskapen
I tilrådinga til styret seier administrerande direktør Håkon Gammelsæter rett ut, at følgjene av sparetiltaka kjem til å bli dramatiske for regionen. Det mest oppsiktsvekkande er tiltaka ein ser for seg ved ambulansestasjonane i Sunndal, Surnadal, Ulstein og Vanylven. Der er forslaget mellom anna å gjere døgnvakta for ein av dei to bilane om til dagvakt for å spare pengar, og i Vanylven er forslaget å fjerne den eine dagbilen.
– Det er sjokkerande at det kan bli fremja slike forslag som kan øydeleggje beredskapen i distrikts-Noreg og spesielt i vårt område, seier Riise.
– Det er heilt uhaldbart. I mine auge vil eit slikt forslag vil koste liv viss det vert gjennomført, legg han til.
– Bør stille plassane sine til disposisjon
Administrasjonen vedgår at den totale beredskapen blir kraftig svekka dersom styret vedtar sparetiltaka. Men målet er økonomisk balanse – og tiltaka må gjennomførast i samarbeid med dei råka kommunane, heiter det i tilrådinga frå administrasjonen.
Riise meiner styret i Ambulanse Midt-Norge umogleg kan vedta ein sparepakke med så store konsekvensar.
– Styret må stille sine plassar til disposisjon om dei har tenkt å gjennomføre dette. For dette må opp eitt nivå i Helse-Midt-Noreg, seier han.