Viikon uutiset kvääniksi joka perjantai NRK Kväänilä

Norja

Yhä usseemala kaupungiila oon tääpänä laikkosähköpotkulauttoi mitä melkhein kuka tahansa saattaa käyttäät. Sen takia oon kans sattunu enämpi vahingoita. Muun muvassa keskiviikko yönä 20-vuotias nainen loukkas päänsä ko hän kaatui sähköpotkulauđala Fredrikstadin keskipaikala. Vamma oli kriittinen.

Nyt hunteerathaan jos ko sähköpotkulauđan käyttääjälle tulis hjelmipakko. Risikko loukkaanttuu sillä oon kymmenen kertaa isompi ko tavalisela sykkelillä, meinaa Trygg Trafikk.

Vuoden ensimäinen ”syysmyrsky” kohtas Lofootin eilen tuorestaina iltapäivälä. Vaarailmotus annethiin Salteniin, Ofoteniin, Lofooteneile, Vesterålenile ja Etelä-Tromssaan. Tuulennoppeus oon ollu korkeimilhaan jopa 30 meetteriitä sekuntissa.

Lofootit oon ollu täysi turistiista. Nyt het haluthaan pois Nordlandista, ja noppeesti. Lossit on tämän takia sielä nyt täysii.

– Mie en ole koskhaan nähny niin paljon trafikkii, sannoo Pål Ramberg, Lødingen-Bognes-lössin kapteini Veserålen Onlinele.

Tromssa ja Finnmarkun, Agderin sekä Trøndelagin fylkkit oon taas vihrissii ECDC-kartala. Rodeland on ainua fylkki Norjassa joka oon vielä oranssi.

Mailma

USA:n länsirannikko oon ollu liekiissä. Yli 100 mettäpalloi rähäytethään USA:ssa ja Kanadassa. Syynä oon muun muvassa lämpöaalto joka oon ollu Californian yllä. Siellä oon ollu viimi pyhänä jopa 54 astetta lämmintä. Kliimatutkiijat sanothaan ette syynä oon kliimanmuutos.

Saksassa ja Belgiassa satheet ja tulvat oon tehny paljon tuhoa ja vieny ihmishenkkii. Keskiviikkona alkanu huono sää oon kaatanu usseita taloja ja nyt kans maa oon alkanu vierimhään tuhoten kaiken mikä sen etheen tullee. Jo yli 100 ihmistä oon kuollu ja usseempi oon hävinny.

Sportti

Italia voitti jalkapallon EM-kilppailun (Euroopanmestaruus-kilppailu) viimi pyhänä. Se pelas Englantii vasthaan. Peli ratkaisthiin rangaituspotkukilppailussa ja päätyi 3-2 Italian hyväksi.

Pelin jälkheen englannin laakin pellaajat Marcus Rashford (23), Jadon Sancho (21) sekä Bukayo Saka (19) oon saanu paljon rasistissii kommentiita. Syynä oon ette het epäonnistuthiin rangaistuspotkussa.

Monet oon tuominu pellaajiin kohdistuneen rasismin. Esimerkiksi Englannin staatsministeri Boris Johnson kirjoitti Twitterissä ette kaikki jokka oon edesvastauksissa näistä kommenteista, pitäis hävetä.

Meiđän mailma

Tuorestaina feirathiin Torniolaksolaisten päivää. Samana päivänä kans Svenska Tornedalingars Riksförbund – Tornionlaaksolaiset täytti 40 (nelje-kymmentä) vuotta.

Kväänit saađhaan oman liiton konstile. Kvensk kunstnerforbund perustethaan augstikuussa ko sen perustajajäsenet, Maija Liisa Bjørklund, Liv Bangsund ja Åsne Kummeneje Mellem, pidethään näyttelyn Vesisaaressa.

Hver fredag publiserer NRK Kvensk de viktigste nyhetene fra siste uke på kvensk. Hva slags nyheter vil du lese på kvensk? Tips oss!