Viikon tärkkeimät uutiset

Kotimaa

Norjan hallitus tuli tällä viikola ulos tarkistetun valtiobudsetti ehđotuksen kans. Siinä se muun muassa ehđottaa ette se hakis 56 miljarttii kruunuu enämpi öljyfondista jotta maala olis varraa avustukshiin, pakolaishiin ja kommuunhiin.

Syynä siihen oon hinttoin ylheinen nousu, sannoi finassiministeri Trygve Slagsvold Vedum pressekonferenssissa tuorestaina.

Hallitus halluu kans anttaa 0,5 miljuunaa kruunuu Kvääniteatterile.

Ihokreftä tappausten määrä oon nousu 20 prosenttii Norjassa. Se tullee esile vuođen 2022 kreftätutkimuksessa joka tuli ulos keskiviikkona. Se oon varsinki vanhempi sukupolvi, joila nyt oon enämpi kreftää ko ennen. Kreftärekisteri tirehtööri Giske Ursin jälkhiin syynä oon vanhaat tavat.

– Monet makas paljon auringossa 1970- ja 80- luvuila. Tieto sen ympäri mitä auringossa palaminen saattaa tehđä ihmisille tuli kymmenen vuotta sen jälkhiin.

Tutkimuksen jälkhiin nuoret suojathaan itteensä paremin auringolta, ja siksi luku ei ole niin niin korkkee heiđän joukossa.

Kuningas Harald makkaa sikhuusissa. Niin ilmoitti Norjan Kuningashuone keskiviikkona. Heiđän jälkhiin kuninkhaala oon infeksjuuni, ja oon sairhausfeeriällä tämän viikon aijan.

Kruunuprinsi Håkon oon toiminu kuninkhaan vikaarina viralisissa tappaamisissa. Hän oon muun muassa kohđatellu Italian presidentti Sergio Mattarellan ko hän oli vierailulla Norjassa tällä viikola.

Kiinan ulkoassiinministeri Qin Gang oli tänään perjantain kylässä Norjassa. Ministeri oon tavanu muun muassa Norjan staatinministeri Jonas Gahr Støren ja ulkoassiiministeri Anniken Huitfeldtin.

Ministerit oon praatanu muun muassa Norjan ja Kiinan yhtheistyöstä, ihmisoikkeuksista ja Ukrainan sođasta. Huitfeldt sannoo ette se oon tärkkeetä pittää hyvä dialogi Kiinan kans.

– Het oon yksi tärkkein tekkiijä internasunaalissa politikissa ja globaalissa ekonomissa, sannoo hän.

Mailma

Tiistaina Venäjällä markeerathiin Nazi-Tyskän hävviimistä vuona 1945. Yhđekses maikuuta oon maan yksi suurin fästipäivä, ja sitä feirathaan joka vuosi kommeesti Punaisella plassila Moskovassa muun muassa paraatilla ja presidentin saarnala.

Tämän vuođen fästisaarnassa maan presidentti Vladimir Putin sannoi muun muassa kunka sota Ukrainassa oon västin syy, ja kunka se freistaa aloittaat sođan Venäjän kans.

USA:ssa maan korkkeinoikkeus oon tođenu ette maan entinen presidentti Donald Trump oon syylinen seksuaalisheen hyökkäyksheen joka tapattui vuona 1990-luvula New Yorkissa. Sen takia oikkeus vaattii ette hän häyttyy maksaat 50 miljuunaa kruunuu vaimole joka kimpphuun hän oli käyny.

Entinen presidentti oon sanonu ette hän tullee valittamhaan oikeuđen päätöksestä.

– Minula ei ole mithään tiettoo kuka tämä vaimo oon. Tämä tuomio oon häppee, kirjoitti presidentti sosiaalisessa meediassa ko tuomio tuli esile.

Suomessa 24 ihmistä, ussee heistä lapsii, lähätethiin sikhuushiin sen jälkhiin ko kävelysilta hajos Espoossa tuorestai aamuna. Silta seiso rakenusplassin vieressä, ja oli väliaikhainen, kirjoittaa Yle.

Pakistanissa tapattui tiistaina suuri ja väkivaltainen meininginnäyttäminen missä ainaki kaksi ihmistä kuoli. Se alkkoi sen jälkhiin ko poliisi otti kiini maan entisen staatinministerin ja cricket-pellaajan Imran Khanin. Poliisi uskoo ette hän olis syylinen korrupsjuunhiin.

Tiistain tappauksen jälkhiin maan päätösvalta oon kieltäny meininginnäyttämisen monissa rekiuuniissa. Maan korkkein oikkeus oon ilmoitannu tappauksen jälkhiin ette Khanin kiini otto olis ollu luvatonta.