Viisi nuorta haavoittui vakavasti ko russepiili ajoi ulos tieltä E39:lä Flakkefjordissa maanantaina. Nuoret, jokka kaikki oon 18 ja 19 vuođen ikäissii, viethiin helikopterilla Kristiansandin, Stavangerin ja Perunan sikhuushiin.
Nuorta, joka ajjoi auttoo, syytethään nyt tapaturmasta. Syynä siihen oon häneltä otettu veripröövi. Poliisi sannoo kuitenki ette se oon liian varhain sannoot, jos syynä olis russi.
Ohjausräntty noussee 3 prosentista 3,25 prosentthiin. Niin ilmoitti keskuspankkijohtaaja Ida Wolden Bache tuorestaina pressekonferenssissa. Syynä noushuun oon kruunun heikko tila mailmalla ja palkkoin nousu.
– Jos kruunu pyssyy huonona, saattaa se olla ette met häyđymä nostaat ränttyi enämpi ko met olima suunitelu, sannoo Wolden Bache.
Viimi kerran räntty oon ollu näin korkkee vuona 2008.
Tuorestaina oli 200 vuotta siitä ko kaksitoista mettäsuomalaista, kuusi Ruottin ja kuusi Norjan puolelta, käveli kuninkhaan luo Stockholmhiin ja vaati heiđän joukole oikeuksii.
Tätä tappausta mettäsuomalaiset feiras eilen Oslossa. Sen het tehthiin flakun nostola ja flakumarssila. Samala se oli ensimäinen kerta ko mettäsuomalaisten oma flaku nostethiin tankhoon viralisessa paikassa.
Norjan staatti tarjoo 3,3 miljarttii kruunuu maanpruukhiin tämän vuođen palkkapraatiissa. Se oon puolet vähempi ko maanpruukkiilaakin 6,9 miljartin kruunun vaatimuksesta.
Staatin tarjous meinais ette talonpojat saatais 40.000 kruunuu enämpi vuosipalkkaa. Se oon aivan liian vähän, meinaa het jokka oon vaatinu 120.000 kruunun noussuu.
– Mie ođotan ette hallituksela oon enämpi rahhaa tarjota palkkapraatissa, sannoo Henrik Nordtun Gjertsen joka oon Norjan kylänuortenilaakin styyrinjohtaaja.
Mailma
Venäläinen päätösvalta väittää ette Ukraina olis freistanu tehđä lennokkihyökkäyksen Moskovan Kremlhiin tiistaiyönä. Heiđän jälkhiin moolina olis ollu tappaa maan presidentti Vladimir Putin. Ukrainan presidentti Volodymyr Zelenskyj kuitenki sannoo ettei het olis ollu hyökkäyksen takana.
– Mutta met taistelemma omala plaanala ja puolustamma ommii kylii ja kaupunkkii, sannoi hän muun muassa tappauksen jälkhiin.
Amerikkalainen päätösvalta oon tutkinu tappausta, ja ilmoitti keskiviikkona ettei het saata vahvistaat ette Ukrainan hyökkäystä Kremlii vasthaan olis tapahtunnu.
Serbiassa kahđeksen koululaista ja yksi turvatyöntekkiijä kuoli keskiviikkona ko seittemen luokkalainan koululainen alkkoi ampumhaan hänen koulussa maan pääkaupungissa Beogradissa.
– Kahđeksen lasta ja yksi turvatyöntekkiijä kuolthiin, ja kuusi lasta ja yksi opettaaja haavoittui, sannoo maan sisänassiindepartementti.
Hyökkääjä otethiin kiini ja oon nyt poliisin hallussa. Uutiskonttori Tanjugin jälkhiin koululainen olis käyttäny hänen isän asetta.
Tuorestai iltana Serbiassa tapattui kans toinen suuri ampumaepisodi. 21 vuođen ikhäinen mies oon nimittäin tappanu ainaki kahđeksen ihmistä ja haavoittannu vakavasti neljeetoista.
Aviisi B92 jälkhiin mies oli aloittannu ampumisen riiđan jälkhiin hänen ystävhiin kans koulun pihala lähelä Mladenovacin kaupunkii. Sitte hän oli pajenu paikalta ajoneuvola samala ko hän jatkoi ihmissii ampumista.
Mies oon nyt otettu kiini. Sisäassiinministeri kuttuu tappausta terroriepisodiksi.
Spaniassa oon menossa rekordi kuiva kausi. Lämpömittari näyttää 38,8 graadii Cordobassa, joka oon lämpimämpää ko koskhaan ennen aprillikuussa. Se ođotethaan ette lämpögraadi tullee heti laskemhaan, mutta kuivuus tullee pysymhään. Joila plaanoila vesimäärät oon 30 prosenttii pienemät ko normaalisti.
Kuivuus oon iskeny kovvaa varsinki maissi maanpruukhiin. Monet oon luovuttannu sen tältä vuođelta, koska vettä häyttyy säästäät ihmisille ja elläimille.
Samala ko monet sannoo ette kuivuus ja korkkeet lämpötilat tyhä oon sattumaa, meinaa tutkiijat ette maa saa nyt kokkee kliimamuutoksen.
Huomenna Charles III ja hänen vaimo Camilla kruunathaan Iso-Britannian kuninkhaaksi ja kuningattareksi. Se tapattuu Westminister Abbeyn kirkossa, missä Charlesista tullee maan 40. kuningas.
Päivä alkkaa Kuninkhaan paraatilla jossa Charles ja Camilla vieđhään Buckinghamin palatsilta Westminster Abbeylle.