Päässiisfeeriän takia met emmä tule ulos videon kans tällä viikola. Nousu viikola Viikon tärkkeimät uutiset pallaa NRK Kväänile normaalissa formaatissa.
Kotimaa
Rekordimoni nuori mies poltttaa silloin tällöin tupakkaa. Se tullee esile vereksessä Kansantervheysinstitutin raportissa «Tupakka Norjassa», Tobakk i Norge.
Raportin jälkhiin ussee nuori mies oon lopettannu tupakanpolton, mutta 19 prosenttii sannoo ette het poltethaan sitä kuitenki silloin tällöin. Prosentti ei ole ollu niin korkkee sitte vuođen 1973.
– Se oon paljon vaaralisempaa polttaa vähän ko ei ollenkhaan, sannoo keukkolääkäri Frode Gallefoss.
21 vuođen ikhäinen mies kuoli Steinkjerin keskipaikala 1. päässiispäivän yönä ko lastipiili ajoi usheeman ihmisen pääle kävely kävelykađula.
Kuljettaaja pakeni paikalta taphauksen jälkhiin, mutta poliisi otti hänen hiljemin kiini. Nyt 30 vuođen ikhäistä miestä syytetthään huolimattomasta ajamisesta, jonka takia ihminen menetti hengen.
Mies oon kans ennen ollu oikkeuđessa. Vuona 2016 oli hän freistanu saađa aikhaan vakavan rautatieonnettomuuđen Sisä-Trøndelagissa.
Norja oon ilmoittannu ette viisitoista Venäjän ambassadöörin työteliijää oon lähđettävä maasta. Niin muisteli ulkoassiinministeri Anniken Huitfeldt tuorestaina pressekonferenssissa.
Työteliijät oon ollu dilpomaattii Norjassa, mutta päätösvalta meinaa ette het kans oon ollu maassa spiunitehtävissä.
– Norjan suhđe Venäjhään oon nyt tođela huono, sannoo ulkoassiinministeri.
Venäjän ambassadööri vahvistaa ette sen 15 työteliijää oon saanu lähtöpäätöksen maasta. Het sanothaan ette teko oon tođela epäystävällinen, ja ette Venäjä tullee vastaamhaan siihen.
NRK päätti tuorestaina ette kaikki sen työteliijät häyđythään poistaat TikTok heiđän työtelefooniista. Syynä päätöksheen oon se ette Nasunaalinen varmuusvirkakunta oon ilmoitannu ettei se anbefaalaa TikTokin käyttöö työntelefooniissa, joita käytethään viralisissa tehtävissä olleevan henget.
Kans Isotinka, Telenor ja usheet komuunit oon pyytäny työteliijöitä poistamhaan apin heiđän työtelefooniista.
TikTok oon yksi mailman populaarisin telefooniappi. Se omistaa kiinalaiset, ja siksi se pöläthään ette sitä käytethään spiunityökaluna.
Mailma
USA:n presidentti Joe Biden oon ilmoittannu ette hän tullee olemhaan kandidaatti maan presidenttivaaliissa vuona 2024. Hän oon jo ennen sanonu ette hän aikkoo hakkee jatkokautta, mutta nyt se oon viralista.
Bideniä vasthaan kilppailussa oon muun muassa Donald Trump ja Nikki Haley.
Tuorestaina Japanin päätösvalta ilmoitti kello kahđeksen aikhaan ette Hokkaido saaren asukkhaat häyđythään evakueerata. Syynä oli Pohjais-Korean rakettipröövi, jonka Japani pölkäs lannata lähele saarta. Evakueeraus varoitus poistethiin 20 minuuttii hiljemin.
– Raketti katos meiđän raadareista heti sen jälkhiin ko se huomathiin, ja se ei ennää näyttäny siltä ette se lanttais Japanhiin, sannoo hallituksen puhemies Hirokazu Matsuno.
Etelä-Korean militääri pittää rakettipröövii vakavanna provokasjuunina.
Mailman meret ei koskhaan ole ollu niin lämpimät ko tämän vuođen päässiisennä. Niin sannoo National Oceanic and Atmospheric Administrationin (NOAA), joka oon mitanu meriin lämpögraadii yli 40 vuotta.
Tiistaina 5. aprillikuuta oli meriin pintalämpögraadi keskimäärä 21,1 graadii. Viimi rekordi, 21,0 graadii, mitathiin vuona 2016.
– Tätä oon osattu ođottaat, mutta se oon selvää ette tämä oon dramaattista, sannoo kliimatutkiija Bjørn Samset.
Korkkeet merilämpögraadit johđathaan muun muassa siihen ette koralliplaanat kuolhaan.
Suuri määrä salaissii USA:n puolustusvoimiin dokumenttiita oon tällä viikola laitettu ulos internetthiin ja sosiaalishiin meedihoin niin ko Twitterhiin ja Telegramhiin. Net oon sisältänheet muun muassa informasuunii sen ympäri kunka USA ja Nato meinathaan auttaa Ukrainaa.
Nyt maan puolustusdepartementti Pentagon oon ottanu kiini 21 vuođen ikhäisen Jack Teixeiran, jonka het uskothaan olleeva tevon takana. Hän oon maan ilmavoimhiin jäsen.
Hei!
Met NRK Kväänilä kojema, ette se oon tärkkeetä kirjoittaat artikkeliita kans kvääniksi. Siksi kans tämä artikkeli oon kväänin kielelä. Halluutko sie kyssyyt jotaki meiđän sanavalinoista tahi olisiko sinula ollu parempi alternatiivi? Lähätä meile e-postii niin kehitämä yhđessä NRK Kväänii paremaksi!