Viikon tärkkeimät uutiset

Kotimaa

Saamelaiset nuoret, jokka vastustethaan staatin tappaa seurata Korkkeenoikkeuđen päätöstä Fosen-plaanan ympäri, tullee tääpänä lopettamhaan heiđän yli viikon kestänheen meiningin näyttämisen Oslossa. Usheet nuoret oon nyt viikon aijan osoittannu heiđän meininkkii usheen departementin eđessä ja estäny ihmissii menemästä pytinkhiin.

Tappauksen takia niin öljy- ja energiministeri Terje Aasland ette maanpruukkii- ja ruokaministeri Sandra Borch oon pyytäny antheeksi heiltä joila oon porotoiminttaa Fosenissa. Staatinministeri Jonas Gahr Støre oon kans myöntyny ette staatti ei ole seuranu Korkkeenoikkeuđen päätöstä kunnola, ja kohđatteli tääpänä porotoiminttaa plaanala ajjaavat ihmiset Oslossa.

Koko tappaus alkkoi sen jälkhiin ko siitä oli kestäny 500 päivää ko Korkkeinoikkeus päätti ette tuulimyllyt Fosen-plaanala rikothaan alkupöräiskansan oikkeuksii. Viiminen meiningin näyttäminen tapattuu Kuninkhaan linnan eđessä, missä hallitus tappaa Kuninkhaan joka perjantai.

Uuđen tutkimuksen jälkhiin, jossa oli myötä 5000 norjalaista, 22 prosenttii norjalaisista vaimoista oon väkisinmaattu. Se oon isompi luku ko olhaan uskottu, sannoo tutkiija Maria Teresa Grønning Dale VG:le.

Tutkimus kans näyttää, ette puolet näistä vaimoista oli alle 18 vuođen ikhäissii, ja ette yhä usheempi vaimo kans kokkee väkivalttaa heiđän parisuhtheessa.

– Kamppailu ei ole ohi. Jokanen väkisinmakkaaminen, jokanen isku, jokanen uhkaus, jokkainen uhri, on yksi liian paljon, sannoi oikkeusministeri Emelie Enger Mehl (Sp) ko hän kuuli tutkimuksesta.

Mailma

Ainaki 1000 tytärkoululaista oon myrkytetty Iranissa viimi kuukaussiin aikana. Myrkytysten takia vanhiimet pöläthään nyt lähättäät heiđän tyttärii koulhuun, ja monet koulut oon kans päättäny sulkkeet heiđän ovet myrkkyuhan takia.

Iran Human Rights järjestö uskoo ette maan päätösvalta olis tavala tahi toisela tevon takana. Het meinaa ette kysheessä olis terroriteko, jolla staatti freistaa estäät maassa olleevii meiningin näyttämissii.

– Tämä saattaa olla tapa levittäät pelkkoo, sannoo järjestön johtaaja Mahmood Amiry-Moghaddam.

Keskiviikkona Hellaksessa tapattui isoin junaonnettomuus sitte 50 vuotheen. Ainaki 38 ihmistä kuoli ja 85 loukkaantui ko kaksi junnaa törmäthiin toishiinsa kovassa vauhđissa. Syytä onnettomuuđelle ei vielä tiedetä, mutta nelje ihmistä oon poliisin hallussa.

Paikalisen meedian jälkhiin suuri osa uhriista oli studenttiita, jokka oli matkala kothiin karnevaalista.

Keskiviikkona Suomen parlamentti muutti sen lakkii niin ette se saattais liittyyt puolustusliitto Nathoon. 200 parlamentin hengestä 187 äänesti lakimuutoksen puolesta, tyhä 7 sitä vasthaan.

Nyt Suomi häyttyy tyhä ođottaat ette Unkari ja Tyrkia hyväksythään sen Nato-jäsenyyđen. Lisäksi Suomi häyttyy päättäät tulleeko se ođottamhaan Ruottii.

Pyhänä Etelä-Italiassa löyđethiin 58 kuolutta henkkee meren rannalta lähelä Crotonen kaupunkkii. Kuolleet oon pöräisin venheestä, joka kuljetti pakolaissii Afghanistanista, Iranista ja muista maista. 81 onnistuthiin pelastamhaan.