Viikon tärkkeimät uutiset viikko 38

Kotimaa

Norjan Pankki, Norges Bank, nosti taas ohjausränttyy. Tuorestaina pankki ilmoitti, ette räntty noussee 0,5 prosenttii ja tullee näin olemhaan 2,25 prosenttii.

Korkkeen ohjausräntyn moolina oon Norjan Pankin jälkhiin vähenttää hinttoin noussuu Norjassa. Ko muun muassa ihmisten talolainoin räntyt noussee ohjausräntyn noston takia, ihmisillä ei ole niin paljon rahhaa muuhun, ja näin esimerkiksi ruovan hinnat ei nouse niin noppeesti.

Norjan Pankki varottaa, ette ohjausräntty tullee nousemhaan vielä lissää tänä vuona novemperikuussa.

Kvääniteatterin ensimäinen näyttämäpeli Näkymätön kansa sai sen premiäärin lauvantaina Raisissa. Samana päivänä teatteri kans viralisesti perustethiin, ja sen omistethaan nyt Tromssan ja Finmarkun fylkinkomuuni, Raisin komuuni, Alattion komuuni ja Vesisaaren komuuni.

Näkymätön kansa oon näyttämäpeli missä nelje nuorta kväänii hajethaan heiđän ommaa identiteettii. Näyttämäpellaajinna oon Sara Maria Malinniemi Lindbach, Ivar Beddari, Ørjan Steinsvik ja Astrid Serine Hoel.

Näyttämäpeli esitethiin keskiviikkona Vesisaaressa ja tääpänä se nähđhään Alattiossa. Uslun ja Tromssan esitykshiin ei ole ennää jäljelä pilettiitä.

Vaimotervheys, kvinnehelse, oon ollu kovassa praatissa tällä viikola Norjassa. Se alkoi ko kolme tunnettuu naista, Vanessa Rudjord, Synnøve Skarbø ja Pia Tjelta ilmoitethiin ette het olhaan myötä aukaisemassa uuđen kaunheusklinikki Nomin Uslhuun..

Klinikin moolina oli tarjota niin kaunheusleikkauksii ja erilaissii hoittoi, jokka oon hyvvii vaimoin tervheyđelle, mutta klinikin pressemellingistä saattoi ymmärttäät, ette het piđethiin kaunheusleikkauksii osana vaimotervheyttä. Moni kritisoi tätä, ja oli vihaissii ette klinikki pittää kaunheusleikkauksii vaimoin tervheytennä.

Keskiviikkona naiset päätethiin lopettaat yhtheistyön klinikin kanssa, ja eilen tuorestaina vaimot oon kans sanonu, ette he ei koskhaan ole meinanu ette kaunheusleikkaukset olis osa vaimotervheyttä.

Mailma

Iso-Britannian ja Pohjais-Irlannin yhđistynheen kuninkhaanvaltakunnan kuningatar Elisabeth II:n hautajaiset, kraviaiset, piđethiin maanantaina. Paikala oli monen maan johtaaja, niin ko Norjan kuningas Harald ja kuningatar Sonja. Kuningas oli nyt kuolheen kuningattaren serkku.

Kuninkhaanvaltakunnan uusi kuningas oon Charles III.

Venäjän presidentti Vladimir Putinin saarna oon luonu huolta ympäri mailmaa. Keskiviikkona Putin ilmoitti, ette 300.000 miestä tulhaan kuttumhaan maan sotaväkheen ja sothaan Ukrainaa vasthaan. Putin kans uhkas västii atomiasheela.

Saarnan takia USA ja Euroopan maat oon alkanu luomhaan uussii rajoituksii Venäjää vasthaan. USA:n presidentti kritisoi Putinia saarnassa FN:n huippukokkouksessa ja sannoi, ette atomisođassa ei ole voittaajaa ja siksi sitä ei piđä koskhaan käyđä.

Västin maitten lisäksi monet venäläiset lähđethiin keskiviikkona kađuile vastustamhaan presidenttii ja hänen päätöstä. Yli 1000 ihmistä piđätethiin ja heiđät jouđuthaan maan sotaväkheen jos het ei halluu fankilhaan.

Tällä viikola irakkilaiset naiset ympäri mailmaa oon filmanu sosiaalisheen meedihaan ko het leikathaan heiđän hykset lyhykäisemäksi tahi kokonhaan pois. Sen het tekkee protestiksi 22 vuođen ikhäisen Mahsa Aminin kuolemalle, joka tapahtui viimi perjantaina.

Amini kuoli sen jälkhiin ko moraalipoliisi piđätti hänen Irakissa koska hän käytti hijabii väärin. Poliisi käytti liian paljon voimaa, ja Amini kuoli kolmen päivän päästä sikhuusissa.

Tappauksen takia monet nyt vastustaa maan kovvii hijabi-reekeliitä, ja filmiin lisäksi ihmiset oon lähteny kađuile näyttämhään tukensa maan naisile.