Se oon kova puutet kväänin kielisistä oppimateriaaliista. Jotta opettajat saatethaan anttaa koululaisile parasta mahđolista opetusta, häyđythään het tääpänä hakkeet materiaalii netistä ja tekemhään sitä itte.
Siksi kommunikasuunifirma Leidar päätti tehđä assiile jotaki.
Heiđän Met nuoret tullee olemhaan mailman ensimäinen kväänin kielinen filmisarja ja filmimuođossa olleeva digitaalinen oppimateriaali, joka oon eriliikaisesti tarkoitettu nuorisokoululaisile.
Sarjan ohjaaja Marianne Ridewood Kleven sannoo ette hän oli kauhistunnu ko hän oppi missä tilassa kväänin kielen opetus oon ollu, ja halus siksi tehđä oman panoksen.
– Mie toivon ette sarja tullee saamhaan nuoret praattaamhaan kväänii vapaa-aijala, sannoo hän NRK Kväänile telefoonissa.
Filmisarja nuorilta nuorile
Met Nuoret oon ohjaajan jälkhiin sarja joka seuraa neljee kvääninuorta ja heiđän elämää Hansinkentälä Raisissa.
Jokhaisella oon ommii jokapäivälissii haastheita ja probleemii, samala ko het käyđhään koulussa ja hengathaan yhđessä.
Se joka tekkee filmisarjasta erityisen oon ette kaikki dialoogit käyđhään kvääniksi, muistelee Ridewood Kleven.
– Siksi oon tosi jännittäävä ja uusi produksuuni meile. Meilä oon paljon kokemusta filmin tevosta, mutta tämä oon ensimäinen kerta ko met emmä ymmärä mitä siinä sanothaan, nauraa hän.
Kukhaan filmissä myötä olleeva ei nimittäin saata kväänin kieltä.
Näyttämäpellaajat, jokka oon pois Raisin teatterimiljööstä, opetelhaan dialoogit ulkkoo ylösottoin avula missä kvääninkieliset henget sanothaan replikit kvääniksi.
Se oon kova haastet ja siksi Ridewood Kleven anttaa kaikile heile suuret apploosit.
Yks assii oon muistaa replikit ulkkoo, mutta het häyđythään kans oppiit oikkee lausuminen, sannoo hän.
– Ja het tođela tekkee sen! Het olhaan tođela flinkkii ja tehđhään ison panoksen.
Filmimuođossa olleeva oppimateriaali
Sen lisäksi ette Met Nuoret tullee olemhaan ensimäinen kväänin kielinen nuorten sarja, tullee se kans olemhaan ensimäinen filmimuođossa olleeva oppimateriaali nuorisokoululaisile.
Jotta sarja olis pedagooginen ja kans kielisesti oikhein, oon Leidar ohjaajan jälkhiin tehny aktiivista yhtheistyötä faakiroikan kans jossa istuthaan pedagoogiita ja kielityöteliijöitä.
Esimerkiksi Eira Söderholm ja Anneli Naukkarinen oon myötä tässä roikassa.
– Oppitiimoila ei saata näyttää mitä tahansa. Siksi se oon tärkkeetä ette materiaali oon tarkasti suuniteltu.
Sarjan lisäksi tullee Leidar kans ulos materiaalin kans mitä opettajat saatethaan käyttäät opetuksessa samala ko koululaiset seurathaan tarinaa.
Hyvänä esimerkkinä oon erilaiset tehtävät minkä avula opithaan net sanat ja setningit mitä sarjassa käytethään.
– Kahđessa jaksossa oppihaat häyđythään kans itte näytelä ja näin käyttää kieltä suulisesti, sannoo Ridewoon Kleven.
– Iso apu
Kväänin ja suomen opettaaja Tromssan kommuunilta, Taija Blencke, toivottellee filmisarjan oikhein tervettulheeksi.
Hän muistelee ette nuorisokoululaisten oppimateriaalille oon tođen totta tarvet.
– Tääpänä ei ole vielä mithään nuorisokoululaisile tarkoitettuu materiaalii, kirjoittaa hän Messengerissä.
Blencke meinaa ette Met nuoret kuulostaa tođela somalta ideeltä. Hän uskoo ette sitä saatethaan käyttäät kouluissa kans kielen opetuksen ulkopuolela.
Sen saattais esimerkiksi näyttää kaikile koululaisile lähelä kväänikansan päivää, tahi ko opettaaja halluu muuten opettaa kväänin kulttuurista ja kielestä.
– Se oon tärkkeetä ette kaikila nuorisokoululaisila oon mahđolisuus tutustuut kväänin kielheen ja kulttuurhiin.
Tullee ulos tänä vuona
Vaikka Ridewood Kleven ei sikkaristi saata sannoot milloin filmisarja Met Nuoret tullee ulos, uskoo hän ette se tapattuu syksyn aikana.
– Meilä oon usheemppii prosektii tällä hetkelä, mutta mie uskalan sannoot ette se tapattuu vuođen 2024 aikana.
Hänen jälkhiin Met nuoret ja kaikki muu materiaali tullee olemhaan saatavanna platformissa johon kaikila opettaajiila ja koululaisila oon pääsy.
– Mie toivon ette sarja tullee vahvistamhaan kväänin kielen opetusta, ja ette se saa uuđen sukupolven käyttämhään kieltä. Se oon ainua tapa saađa kieli elästymhään.