– Mistru og paranoia var måten å overleva på. Miljøet på kontoret var brutalt. Eg høyrde andre journalistar fortelja at sakene deira vart telt opp i løpet av året, for å finna ut kven som skulle få sparken.
Det skriv Dan Arnold, som arbeidde som reporter i skandaleavisa News of the World frå 1994 til 1996.
Avisa vart lagt ned søndag etter avsløringane om at kjendisar, politikarar og pårørande etter ulukker og falne soldatar skal ha blitt avlytta av journalistane til den britiske tabloidavisa.
Siste avlyttingsoffer skal vera tidlegare statsminister Gordon Brown.
Dan Arnold skriv i ein artikkel i BBC om eit konkurranseprega og kynisk arbeidsmiljø i News of the World.
Søndag kom siste utgåva av News of the World. Avisa er involvert i ei omfattande avlyttingsskandale.
Foto: Matt Dunham / Ap25 000 pund til søppelkøyrar
Dan Arnold var 23 år då han starta som journalist i News of the World. Han hadde alt tre år med erfaring frå London-pressa.
– News of the World var heilt annleis. Journalistane der var både frykta og hata. Folk ville sjeldan snakka med oss, så me måtte få tak i historiene våre med andre middel, skriv Arnold.
Han hevdar at avisa ikkje bad han gjera noko ulovleg, men dei gav han til gjengjeld frie hender og nok med kontantar til å gjera eit godt «scoop».
«Få tak i historia til ein kvar pris, for me betalar meir enn alle andre» var premissen for alle artiklane, fortel Dan Arnold.
Ein gong fekk han autorisasjon til å gje 25 000 pund (rundt 220 000 kroner), ein ny bil og ei feriereise til ein søppeltømmar. Det var betaling for ei god historie.
Telefonen til 13 år gamle Milly Dowler skal ha blitt hacka då ho vart meld sakna i 2002. «Menneske med stressande karrierar og store lån kan bli drivne til å ta dei mest sinnsjuke vala» skriv ein tidlegare News of the World-tilsett.
Foto: ApNamngav pedofile
– Moralske skruplar? Sjeldan. Kjendisar, politikarar og ordinære drittsekkar var det rett å ta, skriv Dan Arnold på BBC sine heimesider.
News of the World sitt varemerke var avslørande journalistikk retta mot nettopp kjendisar, politikarar og «ordinære drittsekkar». I 2000 starta avisa "Named, Shamed"-kampanjen der dei namngav antekne pedofile. Den førte til at fleire uskulde vart angripne av mobben.
– Kven bryr seg om etikk når du avslører ein tvilsam politikar eller ein pedofil? I alle fall ikkje eg, skriv Dan Arnold, som missa jobben i 1996, etter omstruktureringar i News International.
Han er glad han ikkje fortsette, og trur sjølv han ikkje hadde vore i stand til å hacka telefonen til den sakna 13-åringen Milly Dowler.
– Men menneske med stressande karrierar og store lån kan bli drivne til å ta dei mest sinnsjuke vala.
