Rekordstrøymer norsk musikk i utlandet

Bergensartisten Kygo, åleine, er strøyma over ein milliard gonger på Spotify så langt i år. Men det er ikkje berre han som har hatt suksess i 2016.

For Alan Walker auka strøymetalet med nesten 1500 prosent. 2016 er eit rekordår for norsk musikk internasjonalt, med ei markant auke i strøymetal, viser tal frå Spotify.

LES OGSÅ: Høyt på listen over verdens beste DJer

LES OGSÅ: Alan Walker droppar maska

Musikkmeldar i VG, Sandeep Singh, trur den internasjonale marknaden ser til Noreg for eit annleis og særeige sound.

– Vi har ein skandinavisk identitet med den kjølige elektronikaen, som nesten er litt stereotypisk. Utlandet elskar artistar som Astrid S og Aurora, seier Sandeep Singh.

Norge tidleg ute

Bransjeorganisasjonen Music Norway meiner Norden var såpass tidleg ute med strøyming, at det kan ha gitt norske artistar ein fordel.

– Det at vi strøymer så mykje gjer at vi blir synlege på internasjonale spelelister og digitale plattformer, seier Kathrine Synnes Finnskog, direktør i Music Norway.

Men det er ikkje berre dei store EDM-artistane og hitmakarane som står for dei høge norske strøymetala.

– 750 000 amerikanarar lyttar til norsk black metal, seier bransjedirektøren.

Den norske jazzen er også populær i utlandet. Og artistar som Todd Terje har leia ei bølge av norsk elektronika ut i verda. Synnes Finnskog trur årsaka er samansett.

– Vi har vore flinke digitalt, vi har gode musikkprodusentar og låtskrivarar og vi har hatt nokre store kommersielle hits. Dette bidreg til at ein får lyst å sjå til Norge, meiner Synnes Finnskog.

Berre det siste året har Music Norway opplevd at internasjonale aktørar i større grad snusar på kva som føregår her oppe. Kritikar Sandeep Singh trur den norske musikksuksessen kjem til å halde fram.

– Vi har ikkje nådd toppen ennå. Kygo og Cashmere Cat er berre starten, seier Singh.