Norske Lise vinn internasjonale songkonkurransar

Ho blir samanlikna med Kirsten Flagstad, og ho utmerkar seg som operasongar i konkurransar. No kan norske Lise Davidsen (28) vinne endå ein internasjonal konkurranse.

Lise Davidsen

FINALIST: Sopran Lise Davidsen frå Stokke i Vestfold vinn store internasjonale konkurransar. No er ho finalist i Dronning Sonja Internasjonale Musikkonkurranse.

Foto: Marius Nyheim Kristoffersen
Lise Davidsen

KJEM LANGT: Lise Davidsen er lyrisk sopran, og av tre konkurransar ho meldte seg på i sommar, så kom ho til finalen i samtlege.

Foto: Charlotte Gundersen

– Den nermaste familien forstår det som skjer no, og det gjer også dei nermaste venene mine, seier Lise Davidsen.

Ho kjem frå Stokke i Vestfold, er lyrisk sopran, og har mellom anna studert ved Det Kongelige Operaakademi i København. Berre i sommar var ho påmeldt til tre konkurransar, og ho kom til finalen i samtlege.

– Eg får meldingar der det står: «Det er ikkje sikkert eg forstår kor stort dette er for deg», og det er eigentleg veldig hyggeleg, for dei har nok rett, seier Davidsen.

– Det er ikkje sikkert eg forstår det sjølv heller. Eg forstår det i ettertid, kanskje til hausten, seier ho.

Vinn konkurransar

Lise Davidsen

PRIS: I Dronning Sonja Internasjonale Musikkonkurranse har Lise Davidsen fått pris for beste framføring av norsk musikk.

Foto: Camilla Storvollen

I konkurransen Operalia i London, der målet er å få fram operaverda sine mest lovande talent og personligheiter, vann Lise Davidsen både hovudkonkurransen, og to andre prisar.

I Belvedere i Amsterdam fekk ho andreplass, og no er ho ein av fem finalistar i Dronning Sonja Internasjonale Musikkonkurranse. Konkurransen blir arrangert annakvart år, og i år søkte heile 223 songarar frå 42 ulike land om å delta.

Dei fem finalistane

FINALISTAR: I Dronning Sonja Internasjonale Musikkonkurranse er det fem finalistar (f.v): Yuriy Yurchuk (Baryton, Ukraina), Alexey Lavrov (Baryton, Russland), Elsa Dreisig (Sopran, Frankrike), Leon Kosavic (Baryton, Kroatia), og Lise Davidsen (Sopran, Norge).

Foto: Camilla Storvollen

– Om eg kunne gjort det om igjen er det ikkje sikkert eg hadde gjort tre konkurransar etter kvarandre. Det er ikkje akkurat det eg har øvd meg fram til, seier Davidsen.

– Eg har vel øvd meg litt på det som kjem no etterpå, det å vera songar, å gjere produksjonar, og det å vera ein operasongar som lever av det, seier ho.​

Samanlikna med førebiletet

Sjølv om dei innleiande rundane i konkurransar føregår midt på dag, så stiller både Lise Davidsen og andre i full gallakjole med sminke og oppsett hår.

Lise Davidsen

KJOLE: Lise Davidsen stiller pynta til konkurransar, sjølv om ho skal opptre midt på dag. Sopranen seier det er til god hjelp å late som om det er ein kveldskonsert når ho skal konkurrere. Finalen føregår på Hovudscenen i Den Norske Opera og Ballett.

Foto: Camilla Storvollen

– Me går inn i ei form for rolle, og for meg hjelper det å pynte meg og late som om det er kveld, å late som om det er ein konsert. Ein gjer det nok for å gi seg sjølv ein «sjøvtillitsboost», seier Davidsen.

Å bli samanlikna med førebiletet Kirsten Flagstad er også noko som aukar sjølvtilliten til sopranen, og ho kan også forstå samanlikninga.

– Eg føler meg på ein måte i heime i det tyske repertoaret, språket, og kulturen, og det var på ein måte det som var Kirsten Flagstad sitt store felt, seier ho.

– Og så trur eg det er noko med denne nordiske vikingklangen, både det fysiske, men også reint teknisk, legg ho til.

Finalen føregår på Den Norske Opera & Ballett, fredag 21. august, og blir sendt på NRK2 frå klokka 19.30, og deretter på NRK1 frå klokka 20.45.

SJÅ OGSÅ:

Lise Davidsen

SJÅ INNSLAGET: Lise Davidsen - gjest i Dagsrevyen den 18. august 2015.

SJÅ OGSÅ: