Ein helt som reiser 1000 år tilbake i tid og får kultursjokk, men så blir sjarmert av det antikke Kina. Det har lenge vore formelen til nokre av dei mest populære filmane og TV-seriane i Kina.
No må kinesiske filmskaparar finne på noko anna, for 1. april kom det statlege film- og TV-byrået i Kina med forbod mot tidsreiser på film og TV. Og det er ingen aprilsnarr.
Respektlause mot historia
Forbodet kjem i 90-årsjubileet for skipinga av det kommunistiske partiet i Kina. Journalist Jonas Hågensen bur i Beijing og fortel til NRK Radioselskapet at fleire av sjåarsuksessane i Kina dei siste åra har hatt tidsreiser som tema.
Høyr heile rapporten. Programleiar er Nina Stensrud Martin:
Mellom anna var TV-serien «Shen Hua» («Myte») ein stor suksess i fjor.
– Den offisielle forklaringa bak forbodet er at filmskaparane ikkje behandlar fortida eller historiefaget med respekt. Kommunistpartiet meiner det ikkje er seriøst nok, har mange faktafeil og så vidare, seier Hågensen.
– Tidsreisene er eit pusterom
Men kinesiske kommentatorar har ikkje tru på den offisielle forklaringa frå kommunistpartiet.
– Dei fleste kommentatorane er einige om at tidsreisene inn i eit Kina som ikkje er styrt av kommunistane er eit pusterom for dei mange unge sjåarane som dagleg blir intellektuelt kvalt av sensuren. Kommunistpartiet føler seg så usikre på seg sjølve at når historia om eit Kina utan dei blir populært, må dei ta affære, seier Jonas Hågensen.
Dette er ikkje eit svart-kvitt forbod, men kjem i ei rekkje av liknande tiltak og vil fungere sjølvsensurerande for kinesiske kunstnarar, skriv The Hollywood Reporter.
Tidsreiseforbodet gjeld førebels ikkje for litteratur og teater.
Kommunistpartiet fyller 90 år i år, og innfører fleire nye sensurtiltak.
Foto: STR / Afp- Les også:
