Høyr jazzlåtane dei har nominert

NRK lanserte kåringa av tidenes jazzlåt 10. mars, og fram til og med 2. april kan kven som helst nominere ein låt kvar til kåringa. Etter det kan du stemme mellom eit finaleheat av dei mest populære låtane, og vinnaren vert utropt 21. april.

Stem på finaleheatet: Stem fram tidenes jazzlåt

Les om fleire nominasjonar her: Bli med på å kåre tidenes jazzlåt

– Låten har ein utruleg dynamikk gjennom ni minutt

Jazzsongar og -låtskrivar Hilde Louise Asbjørnsen nominerer låten «Sing, Sing, Sing (With a Swing)» med Benny Goodmans orkester.

– Den har betydd veldig mykje for meg heilt sidan eg byrja å skrive jazzlåtar sjølv, seier Asbjørnsen.

Låten vart skriven og utgitt av Louis Prima i 1936, men det var klarinettisten Benny Goodmans versjon frå året etter som gjorde den til ein av tidas store klassikarar.

– Den tek utgangspunkt i eit veldig enkelt tema, som musikarane byggjer opp og ned, igjen og igjen. Låten har ein utruleg dynamikk gjennom dei nesten ni minutta den varer.

Høyr låten her:

– Minner meg om ferie, ro og jazz

Skodespelar og songar Kåre Conradi har som mange andre litt vanskeleg for å velje berre éin låt, men i hard konkurranse med Sinatra-låten «In the Wee Small Hours» vert Count Basies «The Kid from Red Bank» utpeika som den beste:

– Den har eit musikalsk driv som er fantastisk intenst, seier Conradi.

– Dessutan har den vore kjenningsmelodi så lenge på radioen, og den minner meg dermed om alt som er av ferie, ro og ... jazz!

Og han er neppe åleine om å forbinde Neal Heftis komposisjon frå 1957 til ferien – den vart nemleg teken i bruk som kjenningsmelodi for Reiseradioen allereie ved oppstarten i 1963.

– Ingen hadde spelt jazz på denne måten før

NRKs jazzjournalist Knut Borge har plukka ut «Giant Steps» med John Coltrane og hans kvartett – ein låt som skapte eit markant skilje i jazzhistoria då den kom ut på albumet med same tittel i 1960.

– Den tok tak i meg og heldt meg fast, det var umogleg å stille seg likegyldig til det Coltrane gjorde, fortel Borge.

– Ingen hadde improvisert eller spelt jazz på denne måten før. Dei neste åra sat nok unge saksofonistar over heile verda og analyserte det Coltrane gjorde. Han opna heilt nye moglegheiter.

Høyr låten her:

Skriv inn din nominasjon i kommentarfeltet under!