– Robin Williams hadde tre år igjen å leve

Den Oscarvinnande skodespelaren Robin Williams døde i august 2014. Enka hans fortel no for første gong i eit intervju om beskjeden han fekk rett før han tok sit eige liv:

– Legane sa at han hadde maks tre år igjen å leve og at det ville ha blitt svært tøffe og vanskelege år. Den siste månaden før han døde greidde han ikkje å samle seg mentalt og stå i mot sjukdomen. Det var som om demninga brast, fortel Susan Williams i eit TV-intervju til amerikanske ABC News.

Ramma av Parkinsons og demens

Tre månader før han døde fekk Robin Williams slått fast at han hadde Parkinsons sjukdom og i tillegg demens:

– Han fekk sterke både fysiske og psykiske plager i månadene før han døde. Han sleit mentalt grunna Parkinsons sjukdom og demens. Han var lei av alle plagene. Då han fekk Parkinsons-diagnosen tenkte han dette er det som vi har leita etter og no har vi funne kva det er. Vi kjende oss letta over å ha funne ut kva det var som feila han, men vi tenkte også kva betyr dette, fortel enka.

På spørsmål om enka eller andre i familien klandrar seg sjølve for dødsfallet svara ho dette:

– Ikkje i eit sekund. Vi gjorde alt vi kunne. Ingen kunne ha gjort noko meir for Robin. Alle gjorde det beste dei kunne. Denne sjukdomen er som eit sjømonster med symptom som femti tentaklar som viser seg når dei vil. Sjukdomen er kjemisk krigføring i hjernen og ein kan ikkje finne den før nokon dør. Det er ingen kur.

Tok siste farvel

Robin Williams sleit i fleire periodar med rus og i tillegg kronisk depresjon. Dei siste åtte åra var han heilt rusfri, men han var plaga av paranoia og depresjon. I tillegg kom Parkinsons sjukdom og demens. Susan Williams fortel at ho ikkje ber nag til mannen:

– Etter han døde har eg sagt til han at eg tilgjev han heilt av heile mitt hjarte. At han var den modigaste mannen eg nokon gong har kjent og at han levde i eit mareritt.

Robin Williams blei 63 år gamal. Han vann Golden Globe, Grammy, Emmy og Oscar for sitt arbeid som både skodespelar og komikar.