Kva bør du sjå på kino i jula?

Programleiar i Filmbonanza i NRK, Vegard Larsen, og filmmeldar i Dagbladet, Inger Merete Hobbelstad plukkar ut sine favorittar blant kinopremierane i jula.

Film om dei stakkars stjernene

Ein av filmane som har premiere 25. desember er Somewhere av Sofia Coppola. Ho fekk sitt store gjennombrot med filmen Lost in Translation i 2003. Somewhere fekk den prestisjefylte Gulløven ved filmfestivalen i Venezia tidlegare i år.

– Det er ein film veldig mange har sett fram til. Ho går her igjen inn i det tomme livet til dei rike og berømte, og ser det gjennom ei absurd linse, seier Inger Merete Hobbelstad.

• LES ÒG: - Jeg er fascinert av ensomheten

Filmen tek opp litt av den same tematikken som Lost in Translation, og sjølv om den første filmen kanskje er meir velluka, meiner Hobbelstad at Somewhere er verd å få med seg. Vegard Larsen er ikkje heilt samd.

– Somewhere er i tommaste laget for min del. Ho lagar ein film for ein elite og overklasse som det er vanskeleg å relatere seg til, vi berre observerer det tomme Hollywood-livet, seier Vegard Larsen.

• LES ÒG: Filmpolitiet: Verre enn verst - Little Fockers

Noomi Rapace i drama

Filmbonanza-programleiaren synest heller ein bør sjå filmen Om guder og mennesker. Den franske filmen er basert på ei sann historie og handlar om ei gruppe munkar i eit kloster i Algerie.

– Det er ein svært stillferdig film, men julas vakraste og såraste film, meiner Vegard Larsen.

Inger Merete Hobbelstad gler seg også til Om guder og mennesker. Men også ein svensk film er på lista over filmar ho gjerne vil få med seg i jula.

– Pernilla Augusts regidebut Skyggesiden skal vere eit svært sterkt drama frå Sverige, med Noomi Rapace, sist sett som Lisbeth Salander, i hovudrolla.

I tillegg kan ein sjå den franske filmen Konserten, og The Town med Ben Affleck på kino frå 25. desember.

Tid for familiefilm

Jula er også for mange tida for familiefilm, og 1. juledag har filmane Legenden om Narnia - Reisen til det ytterste hav og Megahjerne permiere.

Medan Megahjerne er ein animasjonsfilm basert på superheltsjangeren, er Narnia-filmen den tredje i rekkja i filmatiseringa av bøkene til C.S. Lewis.

– Dette er kanskje den mest fragmenterte av bøkene, det slit dei litt med å gjere til ei god dramatisk forteljing. Men den har definitivt sine kvalitetar, seier Hobbelstad.

• LES ÒG: Filmpolitiet: anmeldelse av Legenden om Narnia
• LES ÒG: Filmpolitiet: anmeldelse av "Megahjerne"

Juleklassikarar heime i stova

Ogs skulle ikkje nokon av årets premierer falle i smak, kan ein alltid finne fram nokon av dei gamle juleklassikarane, meiner Larsen og Hobbelstad.

Men dei er begge samde i at mange av julefilmane er ganske enkle og sentimentale, og toler kanskje ikkje å verte sett om att og om att.

– Ein av dei filmane som ein fint kan sjå igjen er derimot Die Hard 1 og 2, som i aller høgste grad er julefilmar, meiner Hobbelstad.

Ho synest også A Christmas Carol av Charles Dickens er ei historie som framleis held mål, sjølv etter å ha vorte filma i eit utal versjonar.

– Den ultimate julefilmen, filmhistorisk sett, er It’s a wonderful Life av Frank Capra, synest Larsen.

• LES ÒG: Filmpolitiets Birger Vestmo sine julefavorittar

• Kva film skal du få med deg i jula - og kva er den beste julefilmen som har vorte laga?