Fleire amerikanske medium har publisert eit bilde av Rudy Giuliani på ein hotellsuite saman med skodespelar Maria Bakalova (24).
Bildet viser at Giuliani ligg i senga med handa nedi buksa. Det heile blei fanga på skjult kamera.
Det skal ha skjedd i samband med innspelinga av Borat Subsequent Moviefilm, oppfølgaren til Borat frå 2006.
I tillegg til Trump sin personlege advokat, er Giuliani tidlegare borgermester i New York.
Dottera til Borat i gåve
I den nye filmen speler Bakalova dottera til Borat på 15 år. Ho gir seg ut for å vera ein journalist som skal intervjua Giuliani. Etter intervjuet foreslår ho å gå inn på eit soverom for å ta nokre drinkar.
USA Today skriv at Bakalova tar av mikrofonen til Giuliani, og at Giuliani så legg seg ned i senga og tar handa nedi buksa, tilsynelatande på skrittet.
Ifølge USA Today var plottet at Borat skulle gi dottera si i gåve til advokaten for å visa respekt til Trump. Borat ombestemmer seg igjen, og Sacha Baron Cohen som speler Borat, kjem stormande inn på rommet, kledd i dameundertøy og ein parykk. Giuliano sjølv meiner situasjonen er misforstått.
Ringde politiet
Opptaka skal ha blitt gjort i juli, og saka blei først kjend etter at Giuliani ringde politiet for å rapportera eit innbrot av ein «uvanleg kledd mann». Han siktar til då Cohen kom springande inn på rommet i situasjonen der han meiner han prøvde å fiksa buksa.
– Ein mann kjem springande inn, med eit sprøtt, såkalla transseksuelt antrekk, sa Giuliani til The New York Post.
Han trudde det var eit ran eller liknande, og fortel at han seinare skjøna at det måtte ha vore Sacha Baron Cohen.
– Eg tenkte på alle personane han har lurt tidlegare, og eg følte meg bra, fordi han ikkje klarte å ta meg, sa han.
Han meiner at han ikkje var upassande under noko tidspunkt av intervjuet.
Sjå traileren til den nye filmen:
