– Ikkje siste setning frå Knausgård

Laurdag vart det kjent at Karl Ove Knausgård seier han gir seg som forfattar. Dette kom fram i et intervju med Radiodokumentaren på P2.

Utgangspunktet er den aller siste setninga i det sjette og siste bindet av romanserien Min Kamp.

Høyr radioklippet her:

– Den handlar om at eg om nokre få minutt skal reise meg frå skrivebordet, gå ut på gata, ta meg ein kopp kaffe og nyte, verkelig nyte tanken på at eg ikkje lengre er forfattar, sa Knuasgård i intervjuet.

– Han vil skrive igjen

Det er ein noko tilbakehalden forlagssjef Geir Berdahl NRK.no pratar med laurdag morgon. Det er tydeleg at nyheita om at Knausgård gir seg som forfattar ikkje har vore diskutert med forlaget. Han er likevel klar over at avslutningssetninga i sjette bind av Min Kamp konkluderar med at forfattarkarrieren er over.

– Eg kan ikkje seie noko anna enn at det sto i ein roman av Knausgård. Men samtida vil vise kva som kjem til å skje. Det står i ein roman, og den romanen er ikkje Knausgård. Det er i iallfall ikkje siste setning frå Knausgård. Så sånn er det.

– Du meiner det er viktig å skilje mellom forfattar Knausgård og romankarakter Knausgård?

– Eg gjer iallfall det. Praksisen vil vise. Men forfattar er han framleis.

Spektakulær avslutning

Kulturjournalist i NRK Hans Olav Brenner har tidlegare intervjua Karl Ove Knausgård. Han er ikkje overraska over at Knausgård no seier han er ferdig som forfattar.

– Eg tenkjer at dette er ein spektakulær avslutning på eit spektakulært verk. Eg er ikkje i tvil om at Knausgård opplever at han har tømt seg litterært for denne gongen og har fått nok av sitt mediale eg.

Men å avskrive Knausgård heilt som forfattar vil heller ikkje Brenner gå med på.

– Det har jo aldri stått noko i vegen for at ein kan stå opp frå dei døde etter å ha erklært seg død som forfattar. Men dersom det er ein samanheng mellom romankarakteren og forfattaren Knausgård bør han nok vente litt.

Kan gjere comeback

Kulturkommentator i NRK, Agnes Moxnes, blei overraska då ho vakna opp til Knausgård-intervjuet i dag.

– Den første reaksjonen eg fekk var at «dette er ikkje mogleg». Eg tenkte at dette å skrive er jo berre noko forfattarane må gjere, at det er ein slags livsnødvendigheit. Og Knausgård er jo ein ekstremt god forfattar, men samtidig er han jo ein pussig mann.

– Ein må berre håpe at dette er hans litterære eg-person som draumar om eit nytt liv. Det ville vere svært synd dersom han gir seg som forfattar.

Likevel seier Moxnes at det vil vere uheldig for Knausgård å gi ut ny litteratur i nær framtid etter å ha slått fast at forfattarkarriera er lagt på hylla.

– Det er jo ofte slik at musikarar trekkjer seg, og så gjer dei eit comeback. Samtidig kan det påkalle latteren dersom han startar på eit nytt prosjekt. Han må rekne med å bli gjort veldig mykje narr av. Det positive ved å ta eit litterært sjølvmord er jo at han vil kommunisere bøkene endå betre. Eit avslutta forfattarskap les ein med heilt andre auge.

Moxnes trur ikkje det er usannsynleg at Knausgård vil konsentrere seg mest om konsulentverksemd i framtida.

– Han er rekna som ein kjempegod konsulent. Han er ein stor leser og kan svært mykje om litteratur. Så den tanken verkar veldig realistisk.

Trur du Knausgård er ferdig som forfattar? Sei di meining under.