Måndag klaga utbyggjar av leilegheitsbygget Pernup i Trysil på vedtaket kommunen gjorde i midten av november.
Trysil kommune vurderte då tryggleiken i bygget som dårleg dersom det skulle bryte ut ein brann, og gav bebuarane beskjed om at dei måtte flytte ut, helst same kveld.
Denne avgjerda vart gjort med utgangspunkt i ein rapport frå Firesafe som sameiget hadde bestilt.
Men ein rapport utarbeida av Safezone på førespurnad av utbyggjar konkluderer med at det ikkje er nødvendig.
Tiltak utan utflytting
Klaga til Trybo legg til grunn at vedtaket om bruksforbod er ugyldig på grunn av uforsvarleg saksbehandling og mangelfull grunngjeving, og at det er eit unødvendig stort inngrep når det er andre alternativ.
I ei skriftleg uttale på vegner av Trybo AS, peikar advokat Karoline Hagen på at det kan gjennomførast fleire tiltak for å auke tryggleiken til bebuarane, ifølgje den nye rapporten.
TRENG IKKJE FLYTTE: Advokat Hagen er tydeleg på at det går an å innføre tiltak, utan at folk flyttar ut.
Foto: Aurlien Vordahl & Co Advokatfirma as– Desse tiltaka er fullt ut mogleg å gjennomføre sjølv om bygget er busett, skriv Hagen.
Både kommunen, brannvesenet, leigetakarar, utbyggjar og dei forskjellige verksemdene som står bak rapportane, er einige om at det er avvik i bygget. Spørsmålet er om desse avvika gir grunnlag på opphøyr av bruk.
- Les meir om kva det var som fekk kommunen til å vedta eit bruksforbod, etter å ha godkjend bygget i 2016:
Ueinig i tidlegare vurderingar
Geir Drangesholt frå Safezone AS tok kontakt med brannvesenet dagen etter bruksforbodet vart vedteke. Han hadde forslag til korleis folk kunne fortsette å bu der på ein trygg måte, og bad kommunen om eit møte om dette.
Det vart ikkje imøtekome.
Desse forslaga tok utgangspunkt i dei dokumenta som allereie låg til grunn i saka. Han meiner det originale inntrykket er underbygd av rapporten selskapet no har gjennomført.
Ifølgje Safezone er biletet meir nyansert enn det som kjem fram i Firesafe sin rapport.
– Vi er også ueinige i fleire av Firesafe sine vurderingar. Difor meiner vi at kommunen har fatta eit forhasta vedtak på ufullstendig grunnlag, skriv Drangsholt i ein uttale på vegner av Safezone.
- Det var ein dramatisk kveld då bruksforbodet vart gitt 15. november:
Svever i uvisse
For leigetakarane er situasjonen enno uavklart, sjølv om dei fleste no har ein stad å bu. Sameiget hadde eit orienteringsmøte 23. november der kommunen var til stade, men sidan då har dei venta på ei avgjerd frå kommunen.
Det byrjar å bli viktig, for fleire har berre mellombels bustad fram til midten av desember.
TØFF PERIODE: Den siste tida har vore slitsam for bebuarane i Pernup-bygget.
Foto: Helle Therese Kongsrud / NRK– Dei svever i uvisse over kor lang tid det kan ta før dei kan flytte attende, så dei har ein tøff og slitsam periode, seier Terje Hagen, styreleiar i sameiget.
Dei fleste som budde i den sentrumsnære bygningen er eldre folk.
Bebuarane er orientert om både rapporten utbyggjar Trybo har bestilt frå Safezone AS, og kommunen si eiga gransking av saka med Norconsult.
– Vi ventar ikkje noko meir før kommunen har teke eit standpunkt ut frå desse utgreiingane, seier styreleiaren.
Alt skal bli gått gjennom
I tillegg til rapportane frå Firesafe og Safezone, hadde Midt-Hedmark Brann og Redningsvesen ei synfaring i oktober som avdekka avvik i bygget. Kommunen har også bestilt ei gransking frå Norconsult.
Den trur kommunen kjem mot slutten av veka, og dei vil arbeide med å finne ei løysing.
GRUNDIG: Kommunen vil ha all dokumentasjon på plass når dei vurderer kva dei skal gjere vidare.
Foto: Ivar Arne Nordrum / NRK– Vi er opptekne av at bebuarane skal føle seg trygge, og skjønner at dei står i ein veldig fortvila situasjon, seier varaordførar Stine Akre.
Akre stadfestar at kommunen vil sjå på rapporten frå Safezone.
– Absolutt alt som er av dokumentasjon skal bli gått gjennom, og kommunen si byggavdeling kjem også til å ha tilsyn og etterprøving av dei ulike rapportane, seier varaordføraren.
Ho legg til at dei vil behandle klagene på forskriftsmessig måte.
