Største leteaksjon etter «Nessie» på over 50 år: – Det er med ein viss risiko

Du hugsar kanskje dette biletet?

Eit grumsete svart-kvitt bilete av ein mystisk skapning med lang hals:

I nesten 1500 år har det komme rapportar om eit stort monster i den skotske innsjøen Loch Ness, og biletet over vart kjent for å vere av Loch Ness-monsteret, som også blir kalla for «Nessie».

Over tusen menneske meiner dei har sett den berømte sjøormen. Men er den ekte?

Saman med forskarar og entusiastar over heile verda skal 23 år gamle Tiktoker Mikael Lien frå Brumunddal prøve å finne svaret – under den største leiteaksjonen etter «Nessie» på over 50 år.

Men kan turistmagneten vere trua?

Bruker ny teknologi i forsøket

Leiteaksjonen går føre seg i Skottland ved den omtrent 12.000 år gamle innsjøen, i regi av The Loch Ness Centre.

Mikael seier det er komme mange hundre personar for å sjå etter sjøormen, som dei skal bruke heile helga på å prøve å finne. Men det kjem stadig fleire monsterjegerar.

– Det dukkar opp bussar på bussar. Det verkar som det er mykje engasjement og at mange er interesserte i å vere med for å prøve sitt beste for å finne «Nessie».

Då 23-åringen kom til landsbyen laurdag vart han overraska over metodane som skal brukast i jakta på monsteret.

– Eg tenkte i utgangspunktet at dette hovudsakleg skulle vere litt show. Men metodane dei skal bruke er jo ganske gjennomførte.

På nettsida til The Loch Ness centre står det:

«Over helga vil oppmålingsutstyr som aldri har vore brukt på Loch Ness før, bli brukt for å avdekkje løyndommane til det mystiske vatnet. Dette inkluderer termiske dronar for å produsere termiske bilete av vatnet frå lufta ved hjelp av infraraude kamera, då observasjon av varme ovanfrå kan vere ein avgjerande komponent for å identifisere eventuelle mystiske anomaliar. Til slutt vil ein hydrofon bli brukt til å oppdage akustiske signal under vatnet, lytte etter eventuelle Nessie-liknande rop, og dessutan ytterlegare teknologi i jakta på sanninga».

Les også Har en forklaring på Loch Ness-monsteret

• Det blir sendt fleire direktesendingar frå leiteaksjonen denne helga. Heile intervjuet med Mikael Lien kan du sjå i Helgemorgen på NRK2.

Pengar i kassa til byen

Myten om monsteret gir mange besøkjande og klingande mynt i kassa til dei lokale bedriftseigarane.

Kvart år besøkjer rundt 400.000 menneske Loch Ness.

Det gir rundt 500 millionar kroner til inntekter til turistnæringa der kvart år, ifølge NRK-korrespondent Gry Blekastad Almås.

– For mange er det sikkert stas om dei klarer å påvise det. Men kva med turistnæringa der oppe om dei no slår fast ein gong for alle at det ikkje eksisterer?

– Så det er med ein viss risiko at dei gjer denne leiteaksjonen òg, vil eg påstå, seier Almås.

Vart plukka opp over heile verda

Det har vore gitt ut bøker, filmar og tallause historier har blitt fortalde om Loch Ness-monsteret. Men det har aldri blitt bevist at monsteret faktisk finst.

Og dette er langt frå første gong nokon prøver å spore opp Nessie.

Det har vorte gjennomført gjentekne ekspedisjonar til Loch Ness for å leite etter sjøormen. Det har vore teke i bruk undervassbåtar og avanserte sensorsystem.

– Både forskarar og andre har leita etter dette monsteret tidlegare, med ulikt resultat, seier Almås.

Ho fortel at den moderne myten oppstod på 1930-talet, då ein hotellsjef såg noko som likna på ein kval i denne innsjøen.

– Dette vart omtalt i lokalavisa der. Dette var berre nokre månader etter at King Kong hadde hatt premiere, så det var kanskje eit klima for monster rundt om. For dette vart plukka opp over heile verda.

Sidan den gong har det komme tallause påstandar om vitneobservasjonar. Men dei fleste konklusjonane viser til at det ikkje er noko monster der.

– Nokre av desse undersøkingane har konkludert med at det kan vere noko som ein ikkje heilt veit kva er i denne innsjøen, medan andre har avvist det heilt og slått fast etter mellom anna DNA-testar at det ikkje finst noko unaturleg i Loch Ness, fortel Almås.

Folk er engasjerte

– Korleis vil du beskrive dette miljøet?

– Det er litt interessant. For folk som trur på dette er 100 prosent overtydde, men dei er ikkje redde. Noko eg kjenner er litt unaturleg dersom du har ein dinosaurliknande skapning i badevatnet ditt.

Mikael seier folk berre er engasjerte og nysgjerrige. Og at det er ein slags lykkeleg optimisme rundt det heile.

Han skal vere i Loch Ness til måndag, og har til no ikkje fått auge på skapningen.

– Men eg skal vere her i to dagar til, så eg er håpefull, smiler han.