– Det er spesielt å vere her.
Det seier Birgitte Kessel frå eit hotellrom nær gamlebyen i Jerusalem.
Til dagleg jobbar 31-åring frå Lillehammer som prest i Manglerud kyrkje i Oslo.
Ho skulle berre unne seg nokre få dagar aleine i Jerusalem etter ein kombinert ferie- og jobbtur i Israel og på Vestbredden.
Men etter mot Israel laurdag har ho stort sett brukt tida på hotellrommet og i bomberommet på hotellet.
– Spesielt fyrste dagen var det mykje frykt og uvisse, og i natt då eg forstod at eg ikkje kunne dra til flyplassen.
Laurdag kveld blei det meldt om over 150 rakettangrep mot den israelske byen Tel Aviv.
Og seint søndag kveld at Hamas truga med å angripe den internasjonale hovudflyplassen i Tel Aviv.
– Det opplevde eg som veldig dramatisk og utrygt, fortel Kessel som etter planen skulle reist heim måndag morgon.
Full mobilisering
Måndag føremiddag rapporterer NRK sin korrespondent i Midt-Austen om at folk i den israelske storbyen Tel Aviv mobiliserer til full krig mot Hamas.
Birgitte Kessel fortel om stengde butikkar i Jerusalem fordi mange no forlèt heimane sine for å melde seg til innsats i krigen.
I går ettermiddag var ho ein liten tur ute i gatene som nærast låg folketomme.
Kontrasten var stor til overfylte gater berre nokre dagar før.
Har vore redd
Laurdag kom Utanriksdepartementet med nye reiseråd for Israel og Palestina. No blir norske statsborgarar råda frå å reise til Israel om reisa ikkje er strengt naudsynt.
Samstundes blir alle reiser til Gaza og til einskilde byar på Vestbredden heilt råda frå.
Det same gjeld for Aust-Jerusalem.
Birgitte Kessel seier at ho har vore redd.
– Ja, absolutt.
Samstundes trur ho at Jerusalem er ein av dei tryggaste plassane ein kan vere i Israel akkurat no.
– Det er veldig roleg. Det er veldig mykje politi i gatene, og stemninga er veldig spent. Men eg trur Jerusalem er ein av de betre plassane å vere no. Men det er dramatisk å vere så nær der kor det skjer bombing og alt.
Måndag ettermiddag har ei rekkje flyselskap kansellert sine ruter til og frå Ben Gurion-flyplassen i Tel Aviv.
Birgitte Kessel har booka om sin flybillett med det tyrkiske selskapet Pegasus, og håpar flyet går som planlagt tysdag kveld. Utfordringa er å komme seg trygt dei fem mila frå Jerusalem til flyplassen.
– Det er lite informasjon om kva som eigentleg skjer, og det er mange fly som går. Men eg opplever det som lite trygt å reise ditover.
Ho fortel at ho har tatt kontakt med norske styresmakter for å prøve å oppdatere seg på situasjonen, etter at UD la ut fleire oppdateringar i går kveld.
– Eg har så vidt snakka med dei i natt om situasjonen på flyplassen, men dei visste ikkje noko meir enn det som vart sagt på nyheitene. Sidan har dei sendt eit par meldingar med oppdateringar om situasjonen.
Kessel seier at ho er meir uroa for folk ho har møtt både i Israel og på Vestbredden enn for seg sjølv.
– Men det er rart å ikkje ha ein ordentleg plan for korleis ein skal komme seg heim.
For ordens skuld: Birgitte Kessel er i nær slekt med ein medarbeider i NRK. Vedkommande har ikkje vore involvert i arbeidet med denne saka.