Flisa-saka: Politiet har gjort DNA-funn på mogleg drapsvåpen

– Det er funne DNA frå den sikta, avdøde og eit vitne i saka på våpenet, seier politiinspektør Henning Klauseie i Innlandet politidistrikt.

Politiet har tidlegare opplyst at mannen som vart funnen død 30. desember, døydde av eit skot i hovudet.

Mannens sambuar, ei kvinne i 70-åra, er sikta for drap.

Det var avisa Østlendingen som først omtalte saka.

• Først elleve dagar etter at mannen døydde slo politiet drapsalarm. Her kan du lese kvifor.

Nektar straffskuld

Den sikta kvinna nektar straffskuld. Onsdag denne veka vart ho lauslaten frå varetekt fordi politiet meiner faren for tap av bevis er redusert.

Årsaka er at politiet meiner å ha funne det dei trur er drapsvåpenet.

Det vart funne i eit våpenskap i fritidsbustaden til sambuarparet på Flisa i Åsnes.

Ifølge Klauseie har kvinna sagt i avhøyr at ho ikkje hugsar å ha flytta på noko våpen.

• Det er mange drapsetterforskingar samstundes i Innlandet politidistrikt. Her kan du lese kva slags konsekvensar det kan føre til.

Naturlege DNA-spor

Forsvarar Helge Hartz er ikkje overraska over DNA-funnet.

– Vitne har forklart at den sikta skal ha vist dei våpenet, og at ho har lagt det i våpenskapet. Då er det jo heilt naturleg at ho etterlèt seg DNA, seier han.

– Det berre stadfestar kva vitne har forklart om min klient. Etter mitt skjønn svekker dette heilt klart saka mot min klient, seier forsvararen til NRK.

Han trur mannen som blei funnen død, tok livet sitt, noko politiet også har presentert som ein teori.

• Fekk du med deg denne saka? Den sikta kvinna hadde full tilgang på åstaden i to veker.

Tre teoriar

DNA-funnet fører ikkje ei stor endring i saka. Mistankegrunnlaget mot kvinna er det same, ifølge politiet.

Politiinspektør Klauseie seier dei jobbar ut frå tre teoriar om korleis mannen døydde.

Den eine teorien er at mannens sambuar har ansvar for at han er død, at ein ukjend person har det, eller at det ikkje har skjedd noko straffbart i det heile.

– Politiets vurdering er framleis at det er meir sannsynleg at ho har eit strafferettsleg ansvar for dette enn det motsette, seier Klauseie.

Etterforskinga framover må mellom anna avklare når kvinna sitt DNA kom på det politiet meiner er drapsvåpenet.

Uventa dødsfall

Det var tidleg laurdag 30. desember i fjor politiet i Innlandet vart varsla om eit uventa dødsfall i ein fritidsbustad på Flisa i Innlandet.

Den avdøde vart sendt til obduksjon.

Etter å ha fått den førebelse obduksjonsrapporten 11. januar, slo politiet drapsalarm.

Det vart funne ei kule i hovudet til mannen, men ingen våpen i nærleiken, ifølgje politiet.

Mannens sambuar, ei kvinne i 70-åra, vart pågripen og sikta for drap.

Sidan midten av januar har ho vore varetektsfengsla, men denne veka vart ho lauslaten.