Satser på mangfold: - Dei fortener ei tydeleg stemme

I mange år har Mats Erik vore fast medarbeidar på Arbeids- og frivilligsentralen på Sør-Fron i Gudbrandsdalen. Her trivst han godt med både arbeidsoppgåvene og det gode fellesskapet med kollegaene sine.

Den nye jobben som frilans reporter kan fint kombinerast med den faste jobben. I dag lager han reportasje frå sin eigen arbeidsstad.

Og det er på Arbeids og frivilligsentralane i dei tre kommunane Ringebu, Sør-Fron og Nord-Fron at avisa Dølen i stor grad har rekruttert medarbeidarar til sin nye redaksjon, TV-Sett.

Sentralane er ein stad der folk med ulik grad av utviklingshemming og dei utan, jobbar side om side. Dei produserer ved, tennbrikettar og utemøblar. Alt er godt etterspurde produkt både av bygdefolket og alle hytteturistane i regionen.

• Hans Olav og Inger tør snakke om det som er pinleg. Les saka her.

Bli kjent og akseptert

Prosjektleiar Erik Wethal Haave synest Mats Erik og dei andre nye reporterane har kome langt.

–Vi starta med presentasjonsmøte for alle tilsette og for deira pårørande. Det var viktig for oss å møte dei som skal jobbe hos oss først! Slik kan dei vere med på å legge premiss for korleis TV-Sett skal bli. Ingen underhaldningskanal, men ekte vare, der medarbeidarane skal vere reporterar på ting som skjer i regionen.

Haave fortel at det var mange spørsmål frå salen – og etterpå.

– Det er jo ikkje rart at mange var spente på kva dette var. Men vi meiner alvor, vi skal bli ein fast redaksjon etter kvart.
Haave fortel at Dølen stiller med kamera og teknikk, medan dei nyrekrutterte blir journalistar. Slik skal dei nye medarbeidarane bli godt inkludert i redaksjonen.

Noko å strekke seg etter

Mats Erik går frå verkstad til verkstad på arbeidssentralen med mikrofonen. Fotografen frå Dølen heng på så godt han kan.

– Liker du deg her? Spørsmålet stiller Mats Erik til Elisabeth Trettengen, som er på jobb i vedpakkeriet. Ho tar seg tid til å svare på spørsmålet.

–Ja, eg liker å jobbe her!

Sjefen heiter Redvald Heggelien. Han synest det er flott at nokre av medarbeidarane her får fleire bein å stå på.

– Å ha eit arbeid å gå til er viktig for at livet skal vere meiningsfylt. Og mest moro blir det når oppgåvene er litt vanskelegare enn det vi trur vi greier. Slik er det for alle! Og nå ser vi for eksempel at Mats Erik også greier å vere reporter!

TV av og med alle!

Avisa Dølen dekker kommunane Nord-Fron, Sør-Fron og Ringebu i Innlandet. Den har meir enn 4000 abonnentar. Redaktør Tone Sidsel Sanden har lenge hatt «mangfald» som eit overordna mål. Dei aller fleste grupper og minoritetar får plass i spaltene her.

– Men det var ei gruppe vi mangla. Det er dei med utviklingshemming. Desse menneska er ressurssterke og fortener ei tydeleg stemme i lokalavisa.

Sanden seier ho vart veldig inspirert da ho høyrde om TV-Bra, som er ein landsdekkande TV-kanal for og med mennesker med utviklingshemming. Dei har redaksjonar fleire stader i landet.

– Dei viser at dette er mogleg å få til. Og eg tenkte – at det kan jammen meg vi som lokalavis også gjere.

Midlar frå Medietilsynet har gjort prosjektet mogleg, nok til at det i første omgang skal gå gjennom heile 2024.

To episodar med Sett-TV er ute nå, og redaktøren har fått mange godord for det folk ser.

– Folk liker det og mange ser på det. Vi får gode tilbakemeldingar frå alle. Enten det er pårørande, politikarar eller lesarar. Og vi er så glade for at dei som jobbar i kommunen med dei folka vil nå, har vore så positive.

– Det skulle berre mangle!

Forbundsleiar Tom Tvedt i Norsk foreining for utviklingshemma (NFU), er strålande nøgd med tilbodet til Dølen.

Han er sjølv busett i Nord-Fron, og les avisa. Og har fått med seg TV-Sett.

– Frå før han vi jo TV-Bra, som er ein nasjonal kanal. At lokalavisa nå satsar slik dei gjer, viser berre at vi verkeleg har mediemangfald.

Tvedt kjemper for rettane og menneskeverdet til dei utviklingshemma.

– Akkurat som alle andre treng dei arbeid og noko å strekke seg etter. Å gå på jobb handlar om identitet, fordi vi gjer noko faktisk betyr noko.
Og når vi blir sett for jobben vi gjer, blir vi glade og tilfredse, Difor er arbeidet kommunane gjer med arbeidssentera og det Dølen gjer med å etablere TV Sett heilt topp, seier Tvedt. .