Det var like før klokka 07.30 at politiet fekk melding om at det var gått fleire steinras på E16 gjennom Nærøydalen.
– Tre større blokker kom ned på vegen, men mykje la seg oppe i terrenget. I utgangspunktet var det eit stort ras, fortel Rune Dvergsdal i Vegvesenet.
Steinane har rasa frå oppsida av vegen ved Hemre, to kilometer frå Gudvangen sentrum.
– Det er ein stor stein på storleik med ein personbil, fortalde trafikkoperatør Ove Amundsen hjå Vegtrafikksentralen måndag morgon.
Politiet meldte tidleg at ingen personar vart råka av rasa.
Blir nattestengd grunna rasfare
Like etter klokka 13.00 opna E16 igjen, etter at geolog hadde vurdert rasfaren med helikopter.
Men E16 mellom Gudvangen og Voss blir nattestengd frå tysdag kveld til onsdag morgon, opplyser Vegtrafikksentralen til NRK måndag ettermiddag.
Årsaka er rasfare og store nedbørsmengder. Vegen blir difor heilt stengd frå klokka 22.00 tysdag til 06.00 onsdag morgon.
– Det er meldt veldig mykje regn i morgon, fortel Rune Dvergsdal i Vegvesenet.
Må køyre om
E16 gjennom Nærøydalen var stengd i over fem timar måndag morgon, og omkøyringsvegane var lange.
Det blir dei også natt til onsdag. Sidan vegen blir nattestengd, må dei som skal mellom aust og vest velje andre fjellovergangar om natta.