RIBBA FOR INNHALD: Fyrverkeri for om lag 100.000 kroner var vekke då tjuveriet blei oppdaga i dag tidleg.
Foto: 03030-tipserFyrverkeriet blei stole frå ein konteinar like ved Kiwi-butikken på Rong.
Klipte over hengelåsar
– Nokon har klipt over fleire hengelåsar og brote seg inn i konteinaren, seier operasjonsleiar Morten Kronen i Hordaland politidistrikt til NRK.no.
Det var tilsette i fyrverkeriutsalet som oppdaga tjuveriet og varsla politiet like etter klokka 9 i dag.
Politiet rykte ut med ein patrulje for å undersøkja åstaden.
– Det er urovekkande at så store mengde fyrverkeri er på framande hender, seier Kronen.
Fyrverkeriutsalet består av to konteinarar. NRK får opplyst at tjuven eller tjuvane også har forsøkt å bryta opp den andre konteinaren, utan hell.
Fleire tjuveri
For ei veke sidan blei det oppdaga eit anna stort tjuveri av fyrverkeri i Hordaland. Då var det snakk om fyrverkeri til ein verdi av om lag 60.000 kroner frå eit lager i Fyllingsdalen.
Politioverbetjent Svein Føllesdal har tidlegare opplyst til Bergens Tidende at ein mann er sikta i saka, men at politiet jaktar på ein annan person.
Det er usikkert om det kan vera ein samanheng mellom tjuveria.
Saka blir oppdatert!
