– Tvungen lønsnemnd løyser ingenting. Dette vil medføra at kampen blir flytta inn på sjukehusa, og me får ei massiv uro og tillitskrise i sjukehusa dei neste åra.
Det seier Geir Arne Sunde, som er føretakstillitsvald i Legeforeningen i Helse Bergen.
Arbeidsminister Anniken Hauglie (H) greip tidleg tirsdag kveld inn med tvungen lønsnemnd i den landsomfattande sjukehusstreiken som har vart sidan 7. september.
Den utløysande årsaka til at ho avslutta streiken, var at Nordlandssykehuset i Bodø varsla at dei ikkje lenger kunne garantera for pasientanes tryggleik.
– Slik situasjonen har utvikla seg har eg ikkje noko val. Den aktuelle situasjonen med udekka vakter ved Nordlandssykehuset inneber at det har oppstått fare for liv og helse som følge av streiken. Streiken har også ført til svært mange utsette undersøkingar, behandlingar og konsultasjonar, seier Hauglie.
Dermed er dei 71 streikande i Helse Bergen tilbake på jobb i morgon tidleg.
– Dei uthula streikeretten
– Spekter framprovoserte streiken, og deretter spekulerte dei frå dag med å styra mot nettopp tvungen lønsnemd. Dei har nekta å bruka dispensasjonane dei har fått innvilga, som er vanleg i streik, så dette er ein målretta aksjon for å uthula streikeretten på sjukehusa. Det er det dei i praksis har gjort, meiner Sunde.
– Men streiken har jo vart lenge, utan at det kjapt vart tvungen lønsnemd?
– Ja, men grunnen til det er utelukkande at uttaket av kven som skulle streika har vore forsvarleg og nøkternt, utan å skada psykiatri, rus, barn eller kreft. Likevel klarte Nordlandssykehuset å framprovosera lønsnemd, meiner Sunde.