Politi og frivillige frå Røde Kors og Norske Redningshunder gjekk tysdag morgon i 5-tida gang med leiteaksjon etter ein sakna mann i 40-åra.
Nesten ni timar seinare, i 13.30-tida, vart mannen funnen i god behald, ved Finnesbergvatnet, søraust for Finse.
Mannen skulle på ein lengre skitur frå Finse laurdag, og pårørande varsla politiet måndag kveld, då han ikkje tok kontakt som avtalt.
Siste livsteikn frå mannen var ein tekstmelding laurdag føremiddag.
– Mannen vart funnen då leitemannskap frå Røde Kors såg spor etter ski og pulk og følgde dei til dei fann mannen. Han var i fin form, seier operasjonsleiar Stine Mjelde i Vest politidistrikt.
Skulle på ti dagar lang tur
Turen skulle vare i ti dagar, men mannen hadde ikkje gjeve lyd frå seg til familien.
– Mannen vil ha hjelp ned til riksveg 7, der han skal klare seg sjølv vidare, seier Mjelde.
Mjelde fortalde tidlegare tysdag morgon at vêret førebels gjer at det er uaktuelt å bruke helikopter i søket.
Dårleg vêr gjorde at det har vore vanskeleg å setje i gang søk etter mannen, men i morgontimane tysdag vart tre snøscooterar sende ut frå Maurset.
– Tolelege forhold
Erling Nesbø i Finse Røde Kors Hjelpekorps deltok i leiteaksjonen. Han fortalde til NRK at dei køyrde ut med tre scooterar frå Finse.
Han fortel at dei ikkje klagar på forholda.
– Akkurat no er det toleleg bra sikt, men litt blindføre og det er kome ein del laussnø. Det kunne ha vore betre, men det er langt ifrå dei verste forholda i dag, seier Nesbø.