– Det er fælt, men vi er klare for ofra huset til fordel for heile Vaksdalsbygda.
Margreta Boge og dottera Torunn Tolås står utanfor gardshuset på Tolåsen i Vaksdal, aust for Bergen. Huset og garden har i fleire tiår høyrd til familien.
Får ordføraren og fleirtalet av sambygdingane som dei vil, vil den nye europavegen mellom Bergen og Voss flyttast ut av sentrum og i staden gå rett gjennom garden deira.
Anbefalinga frå Vegvesenet vil riva fleire hus
Men familien har ingen planar om å vera vanskelege sjølv om garden blir jamna med jorda.
Det hastar å erstatta dagens ras- og ulukkesutsette E16, og dei vil ikkje stogge framdrifta.
– Vi vil helst ha vegen her. Eg meiner alternativet, å dela Vaksdal sentrum i to, er galskap, seier Boge.
Som NRK har omtalt, vil planleggarane heller tilrå å legga E16 og jernbana saman gjennom Vaksdal sentrum. Dette fordi alternativet gjennom garden på Tolåsen vil kosta opp mot 250 millionar kroner meir.
Planleggarane har allereie fått streng beskjed om å halda kostnadane nede.
Tungt hjarte
Men det er ikkje Vegvesenet som tek den endelege avgjerda. Ordførar Eirik Haga (Ap) står klar til å kjempa vidare, no som planleggarane har skissert ut eit alternativ som går utanom bygda.
– Vi kan ikkje legge oss på rygg og la lokalsamfunnet bli utsletta.
Anbefalinga til Vegvesenet vil føra til at fleire hus i Vaksdal sentrum må rivast. Familien på Tolåsen er samde med ordføraren sin, og meiner bygda vil bli øydelagd.
– Det er fleire som blir råka av det, medan her i Tolåsen er det berre vårt hus. Mitt gode samvit seier at Vaksdal skal vera ei heil bygd. Så då er det betre at dei tek garden, seier Boge.
Verken ho eller dottera legg skjul på at det likevel er tungt å kanskje måtte forlata Tolåsen. På Facebook-gruppa "Ny E16 Bergen-Voss umiddelbart" har familien skrive kva dei meiner om saka.
– Det er ikkje med lett hjarte eg skriv dette, men heller eit hus enn ei heil bygd, skriv Torunn Tolås og får varm støtte frå fleire av sambygdingane.
Leverer rapport i haust
Prosjektet med ny E16 og Vossebane mellom Arna og Stanghelle har ein førebels kostnad på over 21 milliardar kroner. Planlegginga held fram og det er venta at ein er klare med ein rapport som har skild ut dei beste trasévala innan kort tid.
I haust skal også NVE gjere flaumundersøkingar i Vaksdal, samstundes som det blir gjennomført seismikk- og grunnundersøkingar for å finne ut kva kvalitet Vaksdals-fjella har.
Samferdsleminister Ketil Solvik-Olsen (Frp), som ifølge Bygdanytt har besøkt Vaksdal kommune elleve gongar på fire år, har lova byggestart av ny bane og veg i 2022.