– Ein tilsett har laga eit dokument som vi behandlar som ein varslingssak, seier Kaare Songstad i Vest politidistrikt til Bergens Tidende.
Etter det avisa kjenner til meiner varslaren at politiet ikkje set inn nok ressursar i kampen mot kriminalitet, og det er særleg narkotikakriminalitet som er tema i varselet.
Kritikk
Politiet i Bergen har tidlegare måtta tola krass kritikk for behandlinga av politimannen Robin Schaefer, som var varslar i samband med etterforskinga av Monika-saka.
No er det ifølge BT fleire tilsette i bergenspolitiet som meiner politiet burde gjort meir opp mot narkotikakriminalitet, men også mogleg menneskehandel og hallikverksemd.
– Det som krev innsats og arbeid for å avdekkast, blir i altfor stor grad liggande. Det er ikkje nok ressursar, seier ein tilsett til avisa.
– Blir tatt på alvor
Den nye varslargruppa i politidistriktet skal behandla varselet i det første møtet sitt 18. august. Varselet, som skal vera omfattande, vart sendt i april.
Ein av dei som sit i den nyoppretta gruppa er politiførstebetjent Bjørn Inge Aarsand ved Voss lensmannskontor.
– Eg vil bidra til at varsling blir tatt på alvor, sa Aarsand til NRK onsdag.