NRK Meny
Normal

I ekspressfart mellom Trolltunga og Preikestolen

I dag vart Trolltunga-og Preikestolen-ekspressen offisielt opna. Den skal frakta turglade turistar mellom Noreg sine to fremste reiselivsikon.

Trolltunga

POPULÆRE TURISTMÅL: Frå 1. juli til 31. august kan du ta ekspressbussen dagleg mellom Trolltunga og Preikestolen.

Foto: Asgeir Helgestad/Artic Light AS og Olaf Erlend Gundersen/ NRK

– For turistar har det vore veldig vanskeleg å koma seg mellom Preikestolen og Trolltunga, og veldig mange turistar ønskjer å gå begge turane. Denne ruta har vore etterspurd og noko vi har jobba lenge for, seier turistsjef i Odda kommune, Jan Helge Oppedal.

Ekspressbuss, opningssang

MUSIKALSKOPNING: Miniklubben Naturbarnehage frå Jørpeland song opningssongen.

Foto: Jan Helge Oppedal

No kan du enkelt kombinera fjelltur til Preikestolen og Trolltunga med buss frå Stavanger til Preikestolen og vidare til Hardanger og tilbake.

For i dag gjekk startskotet for ekspressbussen som skal gå mellom to av Noreg sine mest spektakulære fjellformasjonar.

– Stor entusiasme

Kultursjefen i Odda var ein av fleire som fekk vera med på den fyrste turen med ekspressen til Preikestolen i dag. Der vart dei møtt med raud løpar og offisiell opning.

– Det var mange som tok vel i mot oss då vi kom til parkeringa ved Preikestolen. Det er stor stas og mykje entusiasme rundt denne ekspressbussen. På første tur i dag hadde vi faktisk med tre turistar frå Bangkok. Dei hadde funne informasjon om ekspressen og kjøpt billettar dagen før, seier Oppedal.

Snorklipping ekspressbuss

OFFISIELL OPNING: Ordførar i Strand kommune, Helge Steinsvåg og kommersiell direktør i Tide Reiser, Hege Sandtorv opna ekspressbussen ved Preikestolen i dag.

Foto: Jan Helge Oppedal

Populære turistmål

Turistane strøymer til for å oppleva naturopplevingar, og her står Trolltunga og Preikestolen sterkt. Den nye daglege bussruta har vore ei lenge etterspurd rute.

– Ruta er eit tilbod til turistar som har lyst å besøka desse to naturfenomena. I tillegg kan dei stoppe undervegs og få med seg andre spennande turistmål, som Suldal og Røldal.

– Vi ser at det er blitt veldig populært blant turistane å fyrst gå til Preikestolen og deretter til Trolltunga neste dag. Så denne ruta kjem til å bli eit godt tilbod for desse, legg Oppedal til.

Heilt nytt tilbod

Det er eit aukande tal på turistar som ønskjer å gå til begge plassane, og i dag finst det ikkje ein enkel måte å koma seg frå den eine plassen til den andre.

– Det finst ingen direkte måtar å koma seg til og frå Trolltunga og Preikestolen. Det er som ei mjølkerute om ein skal bruke kollektivtransport, seier Oppedal.

Ekspressen er eit samarbeid mellom reiselivet i Rogaland og Hordaland, og det er Tide som skal drive ekspressen. Ekspressbussen skal ha daglege avgangar frå 1. juli til 31. august 2015.

Siste video

Programleder: Mariann Reikerås
Se forskerne undersøke hvalen
Det aller første julemarkedet i Bergen er en suksess. Den første uken det har vært åpent har tusenvis av mennesker vært innom.