David Fincher er aktuell igjen med den psykologiske thrilleren Gone Girl. Ben Affleck spelar rolla som Nick Dunne, ein mann som opplev marerittet når kona Amy (spelt av Rosamund Pike) forsvinn frå heimen deira.
Den 52 år gamle regissøren står bak kjente filmar som Fight Club, Benjamin Button og The Social Network, samt at han var med å produsera første sesong av Netlflix suksessen House of Cards.
Med filmen er Fincher tilbake i thrillersjangeren der han overraskar publikumet med stadige vendingar og nye utviklingar.
– Eg likar filmar der ein går: Å nei, ver så snill! Det er veldig interessant. Eg følte det i både Hitchcock og Polanski sine filmar. Eg likar når ein som sjåar reagerer slik, fortel Fincher når han møter NRK i forbindelse sleppet av den nye spelefilmen.
- Les Filmpolitiet sin melding av Gone Girl: – Oser av stil, klasse og kvalitet.
Slo gjennom med sjokkavslutning
Og det var også slik den nordamerikanske filmregissøren slo gjennom, då han sjokkerte ein heil filmverd med Seven i 1995.
Eit par år etter ei dårleg debutoppleving som regissør for den tredje Alien-filmen, fekk Fincher sjansen til å revansjera seg med historia om ein seriemordar inspirert av dei sju dødssyndene.
Brad Pitt og Morgan Freeman spelar dei to detektivane David Mills og William Sommerset som jaktar mordaren John Doe (spelt av Kevin Spacey) frå det eine meir brutale drapet enn det andre.
Seven slo ned som ei bombe og vart svært populær, trass eit svært mørkt innhald. Og den store snakkisen var slutten.
(SPOILER! – har du ikkje sett Seven bør du slutte å lesa no – og heller sjå filmen)
Der får Pitt sin karakter levert kona sitt hovud i ei pappøskje. Mange var overraska over at ein Hollywood-film kunne ende på eit slikt brutalt vis.
– Du kan ikkje lage den scena
Men det var slettes ikkje slik produsentane og sjefane ønska at thrilleren skulle slutte.
– Eg las tallause utgåver av manuset. Dei slutta alltid som ein vits, fortel Fincher om prosessen før innspelinga byrja.
Eit av forslaga var at detektiv Mills (spelt av Pitt) rasar tilbake leilegheita si, medan John Doe kryp gjennom vindauga.
– Og så kom det rare forklaringar på kvifor Doe gjorde alle dei sprø tinga. Men vi bryr oss jo ikkje om kvifor haien et dei som svømmer – vi bryr oss om at haien et dei.
Diskusjonen med Brad Pitt og Morgan Freeman landa på at dette var ein «head in the box-movie». Det var det som måtte bli slutten.
Dermed gjekk Fincher til produsenten og sa han hadde endringar. Inne på kontoret får regissøren beskjed om at den scena ikkje kan lagast.
– Seier du ja, kan vi byrje innspelinga om fem veker. Med Brad Pitt og Morgan Freeman i rollene, siterer Fincher sin dåverande produsent.
Fekk nesten sparken
Innspelingane byrja og filmen vart klypt. Og Fincher laga den overraskande og brutale slutten han ville ha.
– Då vi synte den fram til produsentane og studioet, så var alle klare for å sparke meg. Og det vart ein diskusjon om Pitt kunne finne ein av hundane hans sit hovud i boksen, i staden for kona sitt.
– Og Brad Pitt, eg trur ikkje han i det heile tatt trudde at ein slik slutt var ein moglegheit. Han trudde vi spøkte. Men det var der ein var på veg før Brad, Morgan og eg sette ned foten og fekk den slutten vi ønska.
Sjå heile intervjuet med David Fincher øvst i saka! Hans nye film Gone Girl rullar no på norske kinoar.