Fristen har gått ut for å søke fylkeskommunen om støtte til å bygge ordinære ladestasjonar for elbilar.
Målet til Fylkeskommunen var å leggje til rette for at folk skal kunne køyre elbilar kring om i kommunane, men så langt har berre 10 av dei 33 kommunane i Hordaland synt interesse.
– Dette er veldig rart
Det er for svakt, meiner Tom Sverre Tomren frå Miljøpartiet dei grøne.
– Eg er veldig forundra over dei 23 kommunane som ikkje har søkt. Her har dei hatt moglegheita til å få fullfinansiert ladestasjonar i kommunesentera.
– At kommunane ikkje grip den moglegheita alle som ein tykkjer eg er veldig rart, seier Tomren som meiner kommunane viser at dei ikkje tek ansvar for klimaet.
Det er skilnad på ladepunkt for normallading, og hurtigladepunkt. Denne søknadsrunden gjeld normallading, som er ei langt rimelegare investering enn hurtigladestasjonar.
LES OGSÅ:
Ikkje nok pengar til dei som har søkt
Under kvar tredje kommune i Hordaland har søkt om pengar. Men sjølv om dei fleste kommunane sit på gjerdet, er varaordførar Mona Hellesnes godt fornøgd.
– Eg tykkjer dette viser at her er det vilje til å legge til rette for elbilar.
Sjølv om det er få søkjarar blant kommunane, er det likevel ikkje nok pengar til dei som har sendt inn søknad.
Mona Hellesnes seier dei likevel skal få til å byggje ladestasjonar i dei kommunane som har bedd om støtte.
– Her må me sjå både på nasjonale ordningar, kva me kan gjere regionalt og kva kommunane har behov for og kan bidra med. Eg trur me skal få til dette.
LES OGSÅ:
Desse kommunane har søkt om pengar (tal på ladestasjonar i parentes):
- Askøy (2)
- Austrheim (15)
- Bergen (40)
- Eidfjord (2)
- Fitjar (3)
- Fjell (12)
- Os (6)
- Osterøy (2)
- Vaksdal (8)
- Øygarden (12)