Politiet fekk meldinga klokka 7.15 i dag tidleg. Den utrasa natursteinsmuren går like ved ein skuleveg og området blei sperra av.
Politiet valde etter kvart å evakuera eit større bustadkompleks på Kyrkjebyrkjeland.
– Dei har ikkje fått flytta heim, men politiet er ikkje på staden lenger. No er det kommunen som tek over, seier operasjonsleiar Lars Geitle tysdag ettermiddag.
Bratt terreng
Natursteinsmuren skal ifølgje politiet vera stor og fungerer som fundament for bustadhuset.
Det er bratt terreng i området og det regnar kraftig. Politiet fryktar at dei venta nedbørsmengdene vil føra til at større deler av muren rasar ut. Vegen nedanfor er sperra av.
SKULEVEG: Raset gjekk like ved denne gangvegen på Kirkebirkeland. Vegen er ein mykje nytta skuleveg for born i området.
Foto: Kjell Jøran Hansen / NRKDet var ein del folk som ikkje respekterte sperringane politiet satte opp, og politiet måtte stå på staden og passa på. No skal vegen vere tilstrekkeleg sperra av.
50 millimeter regn på få timar
Det er sendt ut OBS-varsel for heile Vest-, Sør- og Austlandet, og meldt store nedbørsmengder i løpet av tysdag ettermiddag.
Politiet oppmodar folk om å sikre lause gjenstander som trampolinar, stillas, hagemøblar og anna som kan blåse bort.
– Det bles kraftig, og vi har fått fleire meldinger om tre som har blåse over ende, seier operasjonsleiar Geitle.
I dag utvida NVE flaumvarselet til gult nivå fleire stader på Vestlandet.
