– Første runde med pliktnummer var i går, og vi har ein god følelse. Eg trur vi ligg godt an, seier nestleiar Viggo Bjørge til NRK på telefon frå Freiburg i Tyskland.
Eikanger-Bjørsvik musikklag er på plass i den tyske storbyen for å delta i europameisterskapen i brass, der dei representerer Noreg etter at dei vann NM for fjerde gong på rad i 2014.
I dag skal brassbandet på scena på ny for å framføra eit nytt nummer.
– Nivået er høgt
Bjørge seier dei har gode håp for ein god plassering, og at dei kanskje også hamnar heilt på topp.
– Me er veldig fokusert på å gjera ein solid framføring i dag. Då er det fullt mogleg å ta pallen og kanskje til og med toppen. Men det kan gå alle vegar, det er utruleg høgt nivå på mange korps som er med.
Nummeret dei skal framføra i dag omtalar Bjørge som «engasjerande».
- Det er eit stykke som vi trivest med, og som vi trur vil gjera eit forrykande inntrykk på publikum.
Vil ha revansj for sølv i 2014 og 2013
Musikklaget veit å hevde seg internasjonalt. I fjor tok Eikanger-Bjørsvik sølv under EM i Perth, det same gjorde dei under Oslo-EM i 2013.
I år håpar dei på revansj og dermed gå heilt til topps, men det er altså tett i toppen. Bjørge tippar det er kring 5–6 brassband som er med å kjempar.
– I toppen skil det lite. Så det blir utruleg spennande.
Vinnarane vil bli offentleggjort seint laurdag kveld.
Deltek i ungdoms-EM
Også ungdoms-EM blir arrangert i Freiburg denne helga. Det byrjar først i morgon. Her deltek to korps frå Hordaland.
Manger Skulemusikk deltek som vinnar av EM i ungdomsbrassband i Skottland i fjor, medan Søreide og Sandsli skolekorps deltek som vinnar av NM i skulekorps brass i fjor.