- Risikogruppene i Bergen får vaksine

Tidlegare i dag blei det kjent at 170.000 vaksinedosar blei øydelagde hjå den belgiske vaksineprodusenten.

Norske styresmakter hadde bestilt 370.000 vaksinedosar, og Berit Feiring i folkehelseinstituttet sa at tapet av 170.000 dosar ville gå utover risikogruppene i Norge.

• Les også: Anbefaler munnbind for H1N1-syke

Får nye vaksinedosar dei neste dagane

Men i Bergen vil risikogruppene bli vaksinert som først planlagt, skriv Bergen kommune i ei pressemelding i dag.

Vaksinane som blei øydelagde skulle sendast ut til kommunane i veke 46.

- Me er blitt lova nye vaksinar i løpet av dei næraste dagane, og så snart dei kjem vil me starta opp att tilbodet om vaksinering av dei definerte risikogruppene, seier informasjonsdirektør Robert Rastad i Bergen kommune.

Rastad seier at dei øydelagde vaksinedosane i Belgia fyrst og fremst kan komma til å gå utover massevaksineringa i Bergen.

- Massevaksineringa mot svineinfluensa i Bergen kan bli utsett, seier han.