Køen er lang av forventningsfulle born som ventar på at ein av dei vaksne skal skru på vatnet. På kvar side i ei påbygd nisje på endeveggen er det skrudd fast to alminnelege vasspreiarar. Snart står vasspruten frå begge sider og ventar på at den fyrste av ungane skal tørre å sykle igjennom.
– Vi tenkjer utanfor boksen, seier barnehagelærar Eivind Linnerud.
Han meiner hovudmålet med satsinga er å ha det artig i kvardagen. Asfaltveg med oppmerking og rundkøyring har barnehagen hatt lenge, og dei har planar om ein bensinstasjon. Då kom to av karane på ideen om å setje i gang med vaskehall, og som tenkt så gjort. Vaskehallen har vorte populær. Mest er han brukt i regnvêr når ungane har på seg regntøy, men også på ein flott solskinsdag er det godt med avkjøling.
Går eigne vegar
Charlotte (4) er ikkje redd for å bli blaut. Ho trør trehjulssykkelen fort igjennom strålane medan ho hyler høgt. Det kalde vatnet prikkar mot nakne T-skjortearmar og snart står ho bakarst i køen, klar for ei ny runde.
Dagleg leiar Berit Tangen seier dei tilsette inspirerer kvarandre med nye idear. Ho legg ikkje skjul på at dei mannlege tilsette er pådrivarar for å få prosjekta ut i livet.
– Dei kvir seg ofte mindre for å setje i gang, seier Tangen.
Det har også hjelpt kvinnene til å kaste seg ut i nye prosjekt. Slik vert dagane artige, for ungane, men ikkje minst for dei vaksne, seier Tangen.
Ho seier og at barnehagen prøver å ta opp i seg det kvardagslivet som ungane møter utanfor barnehageporten.
– Dei fleste av ungane har jo allereie god kjennskap til vaskehall for bilar, seier ho.
Smilande og klissblaut
Vaskehallen har også vist seg å vera praktisk når barnehagen har vore på tur. I staden for å spyle ungane reine, slik dei gjorde tidlegare, setter dei no berre i gang vaskehallen og så blir både borna og leikane reine i same slengen.
Det dryp av hår, klede og trehjulssyklar. Utanfor vaskehallen har det vorte ein svær søledam. T-skjorta til Samuel (4) klistrar seg til kroppen. Han er kald, og skal snart byte til tørt tøy, han må berre køyre ei runde til fyrst;
– Boblebad, stråler han nøgd.