Stort press på bustadmarknaden – i Hemsedal har ordføraren leigd i 17 år – NRK Buskerud

Hopp til innhold

– Draumen er å få vårt eige, seier ordførar Pål Rørby (Sp) i Hemsedal.

No bur Rørby og familien i kårhuset på ein gard. Ein dag skal dei som driv garden no ha kårhuset sjølv. Då må Rørby og familien flytte ut.

– Sånn sett er våre dagar i dette huset talte, seier ordføraren.

Situasjonen til Rørby og Hemsedal er ikkje unik.

Fleire av landets distriktskommunar har utfordringar knytt til bustadbygging og prisutvikling. Det kjem fram i rapporten «Tilgang på bustader i distrikta».

I distrikta er det framleis einebustaden som dominerer, men i Hemsedal er dei ikkje enkle å få tak i. Samstundes stig tomteprisane jamt og trutt.

Nokre kilometer vest for Hemsedal sentrum, ligg bustadområdet Fridalen.

Det er eitt av få pågåande bustadprosjekt i Hemsedal. 19 einingar og tre tomter er alt selde. Tomteprisen startar på 2,3 millionar kroner.

Då salet starta var pågangen så stor at meklarane måtte ty til loddtrekning mellom potensielle kjøparar.

– Me har hatt folk her som eigentleg såg etter hytte, men enda opp med å kjøpe hus og flytte til Hemsedal. Det ser me stadig meir av, seier dagleg leiar Gjermund Svendsen-Rosendal i Fjellmegleren.

– Me har eit luksusproblem i Hemsedal. Veldig mange vil etablere seg her, men det tek litt tid før me får på plass noko til alle, seier Svendsen-Rosendal.

Bygda får 100 nyansatte, men kommunen klarer ikke å finne boliger til dem

Ikkje fleire einingar

Prisane på bustadprosjektet Fridalen, er noko Hemsedal ikkje har sett tidlegare, meiner ordføraren. Han er bekymra for dei som fell utanfor.

– Eg ser på meg sjølv som ein ganske ressurssterk person. Me har ein god og stabil økonomi no, men det er framleis krevjande å kome seg inn på bustadmarknaden. I tillegg forpliktar ein seg med høgt lån i ei usikker renteframtid.

Men Hemsedal sit ikkje stille båten. Kommunen skal i gang med sju ulike byggeprosjekt, med alt frå små enkeltståande einingar til bustadfelt.

– Prosjekta er del av ein større plan, men me såg oss nøydde til å kome i gang – for no har me nesten ikkje bustader att her oppe.

Økonomisk risiko

Distriktssenteret stadfestar at mange kommunar står i same situasjon som Hemsedal.

– Mange kommunar har også ei utfordring med hus som står ledige og blir brukt som utleigehus i fritidsmarknaden i staden for til heilårs busetting, seier Dan-Erik Aggvin, kommunikasjonssjef i Distriktssenteret.

Utvalet av bustader er lite variert og treff ikkje behova til innbyggjarar og næringsliv.

– Det er også ein utfordring at det er økonomisk risiko ved nybygging, seier Aggvin.

Ny gruppe strøymer til bygda: – Ville leve eit anna liv

Manglande kapasitet

Mange kommunar har heller ikkje ressursar til å jobbe med langsiktig planlegging og utvikling knytt til busetting.

– Har kommunen dårleg råd og ressursmangel, er det gjerne den typen overordna planar som blir utsett i dagleg drift, seier ordførar Rørby.

Sjølv håper han familien får frådelt ei tomt, slik at dei kan bygge sjølv.

– Er me heldige, feirar me kanskje jul i eige hus om to år.

Hei!

Så bra du tok deg tid til å lese denne saka. For ei tid tilbake bad NRK om innspel på saker me burde lage. Fleire av de svarte hyttebygging og omsyn til naturen. Difor har me laga denne saka. Har du tips til noko anna me burde skrive om? Ta gjerne kontakt!