Her har dei brukt 5000 timar på å lage tomter på dugnad

Mens hyttefolk og turistar fyller opp Geilo kvar helg og i feriar, slit utkantane, som bygda Skurdalen ei dryg mil unna. Dei 190 innbyggarane lev i konstant frykt for at skulen blir lagt ned, sjølv om dei veit at mange kunne tenkt seg å bu her.

Det store problemet har vore at det ikkje finst tomter og det er fleire år mellom kvar gang det er hus til sals eller leige. For landets nest største hyttekommune Hol, blei det for dyrt å satse på tomter i bygda.

Skulle det vere mogleg å få nye tomter og folk til bygda måtte det dugnad til.

– Det er veldig mykje som er basert rundt hytteutbygginga. Det er der prioriteringa har vore i heile kommunen. Så me bestemte oss for å ta skeia i eigne hender. Det måtte dugnad til for å halde kostnadane nede, seier Britt Haugen i Skurdalen bu og bygdelaug.

Har gjort alt av regulering og planlegging

Bygdelaget fekk ansvaret for alt av planlegging, søknader, regulering og utforming av avtaler. Hol kommune gav bygdelaget grønt ljos og bidrog med tre tomter gratis. Lokale grunneigarar selde resten av grunnen til rimeleg pris.

Det har tatt tre år og 5000 dugnadstimar, men nå står 17 tomter byggeklare.

– Det er verdt det allereie. Det er gøy å stå her og sjå at tomtene har blitt til og at dei fyrste har kome hit, smiler leiar i bygdelaget, Mari Fjørtoft Bjørnstad.

– Men det er ikkje sikkert me hadde stått her i dag om me hadde visst kor mykje jobb som skulle til, legg ho til.

• Synne vil flytte heim – men har for høg utdanning for kommunen

Ville bu ein stad med fjell og snø

Elisabet Øydvin og sambuaren Marius Løvås flytta til Skurdalen frå Jørpeland før sommaren og er dei fyrste som er klare for å busette seg i det nye bustadfeltet.

Dei har funne drøymetomta med utsikt til Hardangervidda og Skurdalsfjorden, og har skiløypene like bak i skogen.

– Me leita etter ein stad med snø og fjell, der me kan bruke naturen i kvardagen utan at det tek tid å kome seg ut, fortel Øydvin.

Prosjektet med tomter på dugnad synest dei var spennande.

– Det er jo veldig unikt og ein føler seg veldig velkomen. Da me kom hit var det litt sånn «Oj, kva er det me gjort nå». Men så blei me kjent med litt folk og oppdaga at det var ein veldig fin stad med mange bra folk.

Kan få til mykje med stor vilje

Seniorrådgjevar ved Distriktssenteret, Hildegunn Nordtug trur små bygder treng eit stort lokalt engasjement for å leve godt framover.

– Eg trur mange løysingar både nå og i framtida avheng av frivillig innsats, der vanlege innbyggarar og lokalt næringsliv saman med kommunen skapar løysingane saman, seier Nordtug som har høyrt om bygdelag som har tatt liknande initiativ.

Men eit heilt bustadfelt på dugnad kjenner ho ikkje til frå før.

– Det er ikkje sikkert det som er gjort i Skurdalen er ein mal for andre plassar, men det viktigaste bodskapet er at ein kan få til noko med ei så stor vilje og uthald som dei har vist.

• 8 av 10 kommunar satsar feil for å få nye innbyggarar

– Dei har dratt på skikkeleg

Ordførar i Hol kommune innrømmer at dei ikkje har fokusert nok på tilflytting til bygda og applauderer initiativet.

– Det engasjementet dei har viser at dei verkeleg vil ha fleire folk. Dei har dratt på skikkeleg og fått til eit veldig spennande konsept som eg trur me kan lære av, seier ordførar, Petter Rukke (Ap).

Sjølv om dugnadsgjengen gjerne skulle hatt litt meir draghjelp frå kommunen, trur dei at det må dugnad til skal ein klare å stoppe den store fråflyttinga i Bygde-Noreg.

– Eg trur iallfall det ein del stader. Det handlar om vilje, men sjølvsagt også om prioriteringar frå dei som bestemmer. Men dugnad hjelper jo til å skape tilhøyrsle og eigarskap til bygda, seier Bjørnstad.