Danskane har blitt betre alpinistar

Danskane har blitt merkbart betre på ski dei siste åra. Dei er faktisk i ferd med å slå oss nordmenn i skibakken, meiner kommuneoverlege og spesialist på alpinskadar Harald Lystad i Hemsedal.

– Danskane har blitt betre fordi dei står oftare på ski. Dei har vore i alpane og kjem hit til Noreg i tillegg. Myten om at danskar er dårlege på ski må ha kome av at dei tidlegare var nybyrjarar når dei kom hit. Slik er det ikkje lenger, seier Lystad.

Knut Erik Hallingstad som har jobba 25 år i skiheisane på Geilo, har og merka ei tydeleg forbetring i skiferdigheita til dei danske gjestane. No ser vi ikkje skilnad på ferdigheitene til nordmenn og danskar.

– Det har endra seg veldig i løpet av mine tiår i bakkane her. Før generaliserte vi og sa at danskane var forferdeleg dårlege på ski.

– Kva har skjedd?

– Dei bruker mykje meir tid i bakken. Når vi opnar klokka halv ti om morgonen står dei klare til å ta heisa opp i bakken. Og medan nordmenn kanskje brukar ei ferieveke i løpet av året på ski, bruker danskane to-tre veker. Vi er blitt meir glad i sommaren og sydenferie, seier Hallingstad.

• Les og: Lav kronekurs gir fest i fjellet

Skadar seg mindre enn før

Søren Nielsen frå København har teke med seg to søner og reist til Geilo på skiferien denne veka. Han avviser at danskane har blitt betre enn nordmennene på ski, men seier det danske folk er ihuga skituristar.

– De siste ti-femten årene har vi reist på skiferie til Sverige og Norge som aldri før. Men like gode som nordmenn er vi neppe, smiler Nielsen.

Knut Erik Fosskaug er avdelingsleiar i Geilo skipatrulje. Han seier talet på uhell i skibakkane på Geilo er omtrent som i fjor på denne tida, sjølv med mange danskar i løypene.

– Dei nyttar heilt klart vinterdestinasjonane meir enn før. Danskane bruker nok skia meir enn mange nordmenn gjer i dag.