– Vi er vande til å samarbeide, men da samarbeider vi først når uhellet eller ulykka er i ferd med å skje eller har skjedd. Nå har vi starta eit samarbeid for å førebu oss i fellesskap, fortel Espen Haugseth, avdelingsleiar i Sivilforsvaret.
Denne veka samlast Drammensregionens brannvesen og Sivilforsvaret i Ullernskogen i Øvre Eiker. Her skal dei saman øve på skogbrannsløkking.
– Vi har laga eit område der vi lèt som det går føre seg ein større skogbrann. Her skal vi prøve å løyse oppgåvene vi løyser kvar for oss, i større grad meir effektivt saman, seier Haugseth.
Øyvind Lothe frå Drammensregionens brannvesen og Espen Haugseth frå Sivilforsvaret planlegg skogbrannopplæringa denne veka.
Foto: Balsharan Kaur / NRKPartane har inngått ei treårig avtale om felles skogbrannopplæring. I denne perioden skal 350 frå Sivilforsvaret og rundt 100 frå brannvesenet blir trena.
Brannvesenet har avgrensa ressursar mannskapsmessig. Sivilforsvaret har mykje ressursar.
– Dermed vil det ved store brannar vere verdifullt for brannvesenet å kunne få støtte frå aktørar som Sivilforsvaret, seier avdelingsleiar i Drammensregionens brannvesen, Øyvind Lothe.
Gult farevarsel
Avdelingsleiar i Drammensregionens brannvesen, Øyvind Lothe håpar folk tenke seg godt om før dei fyrer i marka.
Foto: Balsharan Kaur / NRK– Skogbrannar er veldig ressurskrevjande hendingar som kan gå over lang tid, seier Lothe.
Eit godt samarbeid og felles opplæring betyr at arbeidet med å sløkke skogbrannane kan gjerast meir effektivt, fordi alle dei involverte «snakkar same språk», fortel han.
Dei fleste brannane i ut- og innmark skjer i perioden april til juni.
– Akkurat nå er det inne i ein litt skummel periode, før det begynner å bli grønt. Trevirke og restar frå fjoråret kan fort ta fyr, og det kan bli ein stor skogbrann av det, fortel han.
Måndag 15. april starta det generelle bålforbodet i Noreg. Brannvesenet har sett skogbrannfareindeksen til gul. Det vil seie at det er relativt stor fare for at det kan ta fyr i skog og mark.
– Derfor er det ekstra viktig at det finst eit godt samarbeid og rutinar om det først skulle skje noko, seier avdelingsleiaren i Drammensregionens brannvesen.
Skogbrannøvinga starta måndag og vil vare fram til fredag. Dei kjem ikkje til å tenne på skog, men vil øve på organisering og bruk av utstyr.
Området vil også vere fullt tilgjengeleg for allmenta.
– Å sløkke brannen på ein sikker, god og trygg måte er målet vårt. Det er mykje energi i ein skogbrann, og det kan fort gå gale. Derfor er det viktig å gjere desse tinga rett, seier Lothe.