Morgenandakten tirsdag 29. januar

Du skal ikkje stele

Kristin Lødøen Hope

5. Mosebok, 16 - 21

"Mamma, er Grethe en tyv?" 4-åringen min, såg på meg med store auge, etter at venninna mi var reist tilbake til Oslo. "Nei, korfor trur du det?" måtte eg spørre. "Hun sier hele tiden: Jeg, stjeler litt melk i kjøleskapet, jeg!"

Grethe stal ikkje mjølkeskvetten til kaffien, det fekk ho så meir enn gjerne. Men kanskje er ho likevel ein tjuv, saman med meg og deg og alle andre? Kanskje stel vi litt alle saman, kvar dag?

I Bibelen har vi 10 bod, og sju av dei handlar om korleis vi menneske bør oppføre oss mot kvarandre. Men treng vi eigentleg meir enn eitt av dei sju? Viss vi rettar oss etter bodet "Du skal ikkje stele", treng vi då dei andre seks?

I boka og filmen Drageløperen seier Baba Djan: "Det finnes bare en synd. Bare en. Og det er tyveri. Alle andre synder er variasjoner av tyveri. Når du dreper en mann, stjeler du et liv. Du stjeler en kvinnes rett til en ektemann, du tar faren fra hans barn. Når du forteller en løgn, stjeler du retten til sannhet fra noen. Når du fusker, stjeler du retten til rettferdighet."

Kanskje Baba Djan har rett i det? Vi kunne gjerne fortsette. Når vi lever i overflod, stel vi livsgrunnlaget frå andre, når vi stenger grensene for flyktningar, tar vi frå dei deira muligheit til eit anna liv, når vi ikkje tar vare på kloden vår, stel vi muligheita til gode liv for etterkomarane våre.

Og, noen vil gå så langt å seie at dersom vi lar vere å gi, så stel vi også. Og då handlar det gjerne om dei nære tinga. Om det som ikkje kostar noe.

Den som lar være å si:

"Fin kjole! God artikkel.

Takk for det du sa!

Skjønn unge! Fin innsats.

Deilig mat! Jeg trenger deg.

Takk for at du er til!

God ide!

Den som lar være

å si slike ting stjeler.

Man blir ikke fengslet for å stjele sin

nestes livsmot, livsglede eller anseelse.

Kanskje man burde det?

Hva vil du si er verst:

Å miste sine boksehansker

eller sitt livsmot?

Å miste sin sirkusbillett

eller sin livsglede.

Å miste sitt speil

Eller sitt speilbilde?"

Dette las eg i ei diktbok av Tone Gjelsten Håland. (Lys og Mørke) I eit kvart møte med ein annan person, kan vi gi eller ta i frå. Kanskje vi skulle gå ut i denne dagen å gi litt meir og stele litt mindre?

Kristin Lødøen Hope

sjukehusprest ved Haukeland universitetssjukehus

Musikk: Marthe Valle - "Fader Vår"