– Me veit ikkje heilt når me får inn meir desinfeksjonsmiddel, men grossisten har bestilt inn store mengder som skal fordelast utover, seier dagleg leiar i Apotek1 Førde, Anne-Grete Reikvam.
Dei håpar å få inn meir i slutten av veka.
I tillegg til å vera tomme for handsprit, er apoteket også tomme for munnbind. Også dei andre apoteka i byen er nær sagt tomme for desse varene, på same vis som det er mange andre stadar i landet.
– Det er ikkje inntrykket mitt at folk blir så veldig stressa når dei ikkje får tak i desinfeksjonsmiddel, seier Reikvam.
Ho seier at det er viktig for dei å opplysa kundane om Folkehelseinstituttet sine råd for å beskytte mot smitte.
– Fyrstevalet er handvask med såpe og vatn.
Apotekaren seier det også er ein del etterspørsel etter munnbind.
– Me anbefalar ikkje å bruka munnbind. Det førekjem det ofte feilbruk av, som faktisk kan auka smitterisikoen, seier Reiekvam.
Auka voldsomt i februar
– I februar selde apoteka i Noreg om lag fem gongar så mykje desinfeksjonsmiddel som tilsvarande månad i fjor, seier Jostein Soldal som er kommunikasjonssjef i Apotekforeningen.
Også i januar selde apoteka meir handsprit enn vanleg. Soldal seier at han ikkje er overraska over at apoteka går tomme med tanke på pågangen.
– Apoteka og grossistane gjer nok det dei kan for å fylla opp varelagera, seier han.
– Kan det henda ein går heilt tom for desinfeksjonsmiddel?
– Eg har ikkje oversikt over kva innkjøpsmogelegheiter apoteka og grossistane har. Det er likevel klart at dette er produkt det også er stor etterspørsel etter i andre land, seier Soldal.
Også i samband med svineinfluensapandemien i 2009 og 2010 hugsar Soldal at det var høg etterspurnad etter antibakterielle middel og periodevis utselde apotek.
Anbefaler god handvask
– Å vaska hendene godt med lunka vatn og flytande såpe er det rådet me gir, seier Kari Holvik Furevik, seksjonsleiar smittevern i Helse Førde.
Ho trekk fram at ein bør vaska nevane når ein kjem heim, når ein har vore på toalettet, før ein et og om ei har vore i kontakt med sjuke.
Furevik kjenner ikkje til leveringsproblem rundt desinfeksjonsmiddel til Helse Førde.
– Kva gjer de om de står i fare for å gå tomme?
– Me kjem til å gjera tiltak før me er tomme for desinfeksjonsmiddel, seier ho.
Tiltaka kjem til å dreia seg om å vera tydelegare på når det er ein skal og når ein ikkje skal bruka desinfeksjonsmiddel.
Seksjonsleiaren har lite tru på at andre etanolbaserte produkt direkte kan erstatta handsprit.
– I desinfeksjonsmiddel er det minst 70 prosent etanol, seier Furevik.