Eckhoff spurtslo OL-vinnar i langrenn: – Det er heilt rått!

• NRK følgje OL direkte: Slik var fellesstarten for kvinner

Evi Sachenbacher-Stehle (33) tok nemleg gull på lagsprinten i Vancouver-OL 2010. Etter dette gjekk ho over til skiskyting. Måndag fekk ho juling i spurten av 23 år gamle Tiril Eckhoff frå Bærum.

– Eg hadde ein draum, eg hadde det. At den er verkeleg no er heilt utruleg, seier Eckhoff til NRK etter tredjeplass og bronsemedalje.

– Du er klar over at du har spurtslått ein dobbelt olympisk meister i langrenn?

– Nei, det var eg ikkje, men det er alltid deilig å få vite. Det er rått!, flirer Eckhoff.

Ho omtalar medaljen sjølv om «ein skrell» og fortel at ho svevar på ei sky. Det var då ho gjekk ut frå siste skyting at ho forstod at medaljesjansen var til stades.

– Då tenkte eg «yes, dette er moglegheita mi!».

– Det er så bra for framtida

23-åringen har tidlegare ein tredjeplass som beste plassering i verdscupen. Måndag ettermiddag blei det OL-medalje.

– Fantastisk av Tiril! Dette er noko av det kjekkaste eg har opplevd. Eg unner ho det så mykje, og det er så bra for framtida til norsk skiskyting. Eg tek av meg hatten, seier NRK-ekspert Liv Grete Skjelbreid Poirée.

Darya Domratsjeva tok sitt tredje gull i OL. Gabriela Soukalova tok sølvet.

Rørt trenar

Eckhoff sjølv kalte seg sjølv «ein sippeunge» etter alle gledestårene. Trenar Egil Gjelland var ikkje langt unna å kunne kallast det same.

For det var ein rørt trenar som møtte NRK.

– Det er enormt, vanvittig bra. Ho gjer ein fantastisk innsats. Ho har jobba knallhardt i fleire år, seier Gjelland.

Også trenaren er klar på at bronsevinnaren er ein løpar for framtida.

Favoritten tryna

Skia var endeleg i orden på fellesstarten, men for det største norske håpet gjekk det gale allereie før første skyting.

Halvvegs ute i den første runda gjekk Tora Berger i bakken på klønete vis. Ho mista mange sekund, og klarte aldri å hente seg inn igjen.

Dette trass i at både ho, Eckhoff og Ann Kristin Aafedt Flatland skaut fullt på første skyting.

Full kontroll på nervane

Med fulle norske hus på første skyting, blei det éin bom på alle dei norske jentene på andre skyting.

Eckhoff låg best an av dei norske ut frå andre skyting på ein 16.-plass – 37,5 sekund bak leiande Domratsjeva. Etter passering 5,9 kilometer hadde Eckhoff gått seg opp til 13.-plass. På 6,5 kilometer var ho nummer 11.

Etter fullt hus på tredje skyting gjekk ho ut på fjerdeplass, 46,5 sekund bak Domratsjeva, men berre 11,1 sekund bak Sachenbacher-Stehle på tredjeplass.

Mellom tredje og fjerde skyting blei ho henta inn av Kaisa Makarainen. Inn til siste skyting var ho fem sekund etter tysk og finsk motstand.

Makarainen bomma éin gong, medan Sachenbacher-Stehle fylte. Med ei lynrask ståande skyting følgde derimot Eckhoff opp med fullt hus.

– Mektig imponert

Den siste runden blei av det ekkelt spennande slaget. Eckhoff jaga saman Teja Gregorin og to tredelar inne i den siste runden hadde dei henta inn Sachenbacher-Stehle.

Så blei Gregorin distansert. 23 år gamle Tiril Echhoff mot 33 år gamle Evi Sachenbacher-Stehle – tidlegare langrennssprinter.

Vel inne på oppløpet fekk ein derimot sjå enorme krefter frå den unge bæringen. Den tyske veteranen blei distansert, og Eckhoff glei over målstreken til ein sensasjonell bronsemedalje.

– Eg vil ikkje seie eg er overraska, for eg har sett spurteigenskapane. Men det er alltid vanskeleg nå ho ikkje har spurta mot Sachenbacher-Stehle før, seier Skjelbreid Poirée.

– Men eg er mektig imponert. Kapasiteten har vore der og ho har vore litt outsider heile vegen. I dag hadde ho dagen og då er ho der, jublar NRK-eksperten.