– Førebels er det ikkje noko som tyder på at vi får fleire tilfelle. Men vi er vakne i forhold til det, seier smittevernlege Harald Reiso til NRK.
Laurdag kveld fekk to bebuarar behandling for legionella ved sjukehuset i Arendal. Dei har truleg fått smitten gjennom dusjanlegget i bygget.
Har innført dusjforbod
Personalet ved omsorgssenteret fekk mistanke om smitten etter at fleire bebuarar hadde fått luftvegsinfeksjonar.
– Vi meiner at problemet må vere vatnet, altså vasspartiklar med legionella som er årsaka, seier smittevernlegen.
Kommunen har innført dusjforbod medan det pågår undersøkingar. Alle dusjhovud og dusjleidningar vert no desinfisert med klor.
Kommunen køyrer også vatn på 65 grader gjennom heile anlegget for å spyle det.
Sjekkar heile anlegget
– Vi må sjekke heile anlegget. Vi må sjekke om temperaturen er høg nok og om deler av anlegget har stilleståande vatn slik at legionella kan formeire seg og komme ut i varmtvatnet. Det er det vi jobbar med no, seier Reiso.
Det er personar med lungelidingar eller som er sjuke som er mest utsett for å få legionella-lungebetennelse.
– Dei to som er innlagde er eldre menneske. Det er eldre som vert ramma og som har ei grunnliding som medfører lungeproblematikk frå før. Det kan vere alvorleg infeksjon på grunn av det, seier Reiso.