Innesnødd i ei veke: – Det er skummelt

Ragnhild Bjåen held på å måke seg fram til fjøsen då NRK møter ho og familien. Ho skal i gang med fjøsstellet.

Snøkaoset har gjort at bonden har måtte tømme ut til saman 4000 liter mjølk.

Tankbilen har ikkje komme fram til den vesle bygda, som har vore isolert på grunn av enorme snømengde.

I fire døgn var dei utan både veg, telefon og delvis straum.

• Les også: – Har ikke opplevd maken på 50 år

Full fjøs

– Det er jo ikkje noko morosamt når du må tømme ut 2000 liter mjølk kvar gong. No har vi gjort det to gonger, seier ho.

– Kyrne produserer og det er jo mat og ein ressurs. Det er ikkje noko kjekt å jobbe for at du må slå mjølka ut, seier Ragnhild.

Brøytemannskapa har ikkje hatt sjans til å halde vegen inn til bygda open. Kraftig snøfall og vind har dermed gjort det umogleg for slaktebilen å ta seg inn.

– Vi har måtte utsettje levering av dyra. Det er litt fullt akkurat no, men vi håpar det snart vert betre vêr, seier gardbrukar Anders Dalseg.

Kraftig snøfall og vind har gjort det umogleg for brøytemannskapa å halde vegen inn til den vesle bygda open. Bygda ligg på 900 meter over havet på grensa til Telemark.

• Les også: Nesten to meter snø på Hovden

Unormalt mykje snø

Sondov Bjåen er fødd på Bjåen, driv turiststasjon og likar snø. Han har hatt ein grundig gjennomgang av gamle hyttebøker og hukommelse.

Han meiner at det aldri har vore så mykje snø så tidleg på året.

– Så mykje snø kan eg ikkje minnast på denne årstida. Det har nok vore like mykje totalt i løpet av vinteren, men ikkje så tidleg på året som no, seier han.

Ragnhild Bjåen, som også driv økoturisme i fjellstoga bestefaren sette opp, veit at livet i fjellheimen kan vere tøft.

– Det er ein viktig del av opplevinga å komme hit for mange trur eg. Så er det jo ein del som tykkjer at det vert litt mykje av og til, når det vert så ekstremt, seier ho.

• Les også: Sivilforsvaret må måke snø på tak