– Eg må seie eg er overraska. Valkrinsen er så splitta på midten som den kan komme, seier ordførar i Arendal, Einar Halvorsen til NRK.
– Det har vore ei gruppe som har køyrt veldig sterkt på at dei ynskjer ein overgang til Froland. Nei-sida har tydlegvis komme sterkt i valet, seier Halvorsen.
Arendalsordføraren har lita tru på at Løddesøl får lov til å byte kommune. Det er Kommunaldepartementet som må seie endeleg ja eller nei.
– Arendal bystyre har gitt ei anbefaling til departementet om at Løddesøl krets bør og må vere i Arendal. Likevel valde vi å ta denne rådgjevande folkeavstemninga. Det skal nok mykje til for at departementet let dei flytte over til Froland, seier han.
Også NRK Sørlandets valekspert Dag Ingvar Jacobsen er overraska over resultatet.
– Vanlegvis plar det vere veldig for eller imot. Her har vi ei bygd som er splitta fullstendig. Det er så usikkert her at er nok ikkje sjans for dei får byte kommune, seier Jacobsen.
